Kim Kardashian ka dhënë një përditësim mbi marrëdhënien me ish-bashkëshortin e saj, Kanye West, në një intervistë për revistën Complex, e publikuar të enjten. Deklarata vjen rreth një javë pasi u raportua se ajo po zhvillon një lidhje romantike në fshehtësi me pilotin e Formula 1, Lewis Hamilton.
“Ne do të jemi gjithmonë familje,” tha themeluesja e Skims. “Të dy e dimë këtë. Gjithçka do të jetë në rregull dhe ka shumë dashuri për familjen tonë.”
Kardashian theksoi se ajo dhe West kanë të njëjtin qëllim: të mirën e katër fëmijëve të tyre — North, 12 vjeçe, Saint, 10 vjeç, Chicago, 8 vjeçe dhe Psalm, 6 vjeç.
Ish-çifti nisi lidhjen në vitin 2012 dhe u martuan në Itali dy vite më vonë. Kardashian paraqiti kërkesën për divorc në shkurt të vitit 2021, ndërsa martesa u finalizua ligjërisht në nëntor të atij viti.
Kanye West u martua me Bianca Censori në dhjetor të vitit 2022. Po atë muaj, Kardashian shpërtheu në lot duke folur për sfidat e bashkëprindërimit me reperin gjatë një episodi të podcastit “Angie Martinez IRL”.
Ajo ka folur edhe më herët për marrëdhënien e vështirë mes tyre, duke pranuar në një episod të “The Kardashians” në nëntor 2025 se dinamika mes saj dhe West e kishte bërë të ndihej në kufijtë e durimit.
“Nuk mund të angazhohem gjithmonë,” kishte thënë ajo. “Mendoj se ndonjëherë kjo është për të mirën e të gjithëve.”
Kardashian dhe West kanë pasur përplasje edhe lidhur me jetën e saj sentimentale pas ndarjes. West u bë veçanërisht i komentuar në vitin 2022 për sulmet publike ndaj ish-të dashurit të saj, Pete Davidson. Më vonë, Kardashian tha se kjo situatë e kishte bërë të ndihej shumë keq dhe se nuk kishte qenë e drejtë ndaj Davidson.
Pas divorcit, Kim Kardashian është përfolur për lidhje me Odell Beckham Jr. dhe Tom Brady, ndërsa së fundmi ka tërhequr vëmendje romanca e saj me Lewis Hamilton. Sipas mediave, dyshja kanë kaluar një fundjavë romantike në Evropë, duke udhëtuar nga Cotswolds drejt Parisit.
Kanye West, i cili më parë ka shprehur vlerësim për Hamilton, nuk ka reaguar ende publikisht lidhur me këtë lidhje të re.
