Pas një jave përgatitjesh të çmendura vjen mbrëmjen e kësaj të diele, ndeshja më e madhe e Amerikës. “Super Bowl 60” do të mbahet në Santa Clara të Kalifornis ku skuadra e “New England Patriots” synon rekordin me një fitore të shtatë.
Në krahun tjetër “Seattle Seahawks” janë më pak favoritë për të ngritur trofeun, por kjo ndeshje ka të bëjë më shumë me spektaklin dhe rekordet sesa thjesht përcaktimi i kampionëve të NFL. Shumë yje nga sporti, muzika dhe kinemaja do të bëhen pjesë e asaj që është një nga ngjarjet më të mëdha në sportin botëror.
Miliona do ta ndjekin nga e gjithë bota. Tre finalet e fundit kanë qenë transmetimet televizive më të shikuara në SHBA që nga ulja në Hënë në vitin 1969. Vëmendja do të jetë në spektaklin e pushimit të ndeshjes ku do të performojë reperi Bad Bunny.
Presidenti i SHBA, Donald Trump nuk do të jetë i pranishëm këtë herë. Ndoshta edhe sepse superylli portorikan ka qenë kritik ndaj Trump dhe politikave të imigracionit të administratës së tij.
Ylli i pop, Bad Bunny do të udhëheqë spektaklin këtë vit. Ai ka qenë i ftuar special edhe në vitin 2020 kur kryesuese ishin Shakira dhe Jennifer Lopez. Ai do të jetë artisti i parë mashkull latin që do të performojë shfaqjen e pjesës së parë, por edhe artisti i parë që do të performojë tërësisht në spanjisht.
Grupi rok Green Day, i cili është nga Kalifornia, do të performojë gjithashtu. Edhe këta kanë qenë kritikë ndaj Presidentit Trump, dhe zgjedhja e tyre ka shkaktuar kundërshtime në qarqet mediatike të krahut të djathtë.
Trump, ishte presidenti i parë në detyrë që mori pjesë në ndeshjen më të madhe të Amerikës vitin e kaluar, por këtë vit tha se bregu perëndimor është "shumë larg". I pyetur për përzgjedhjen e Bad Bunny dhe Green Day, Trump shtoi: "Unë jam kundër tyre. Mendoj se është një zgjedhje e tmerrshme. E tëra çfarë bën është të mbjellë urrejtje."
Në shkallët e stadiumit pritet të jenë Roger Federer, Jay-Z, Travis Scott, Mark Wahlberg dhe pronari i PSG, Nasser Al-Khelaifi. Këngëtari Jon Bon Jovi, do të prezantojë lojtarët e Patriots ndërsa aktori Chris Pratt do nderojë Seahawks.
Statistika të çmendura
Bileta më e lirë e rishitur e disponueshme të enjten kushtonte 4,388 dollarë. Super Bowl i vitit të kaluar u ndoq nga një audiencë televizive prej 127.7 milionë njerëzish në SHBA.
Performanca e Kendrick Lamar në pushimin e pjesës së parë të vitit të kaluar pati mesatarisht 133.5 milionë shikues, duke e bërë atë shfaqjen më të shikuar të pushimit të pjesës së parë ndonjëherë.
Reklamat televizive janë shitur mesatarisht për rreth 8 milionë dollarë për një interval prej 30 sekondash. Pati edhe nga ato që kushtuan me një rekord prej 10 milionë dollarësh.
Amerikanët do të vënë baste me një rekord që pritet të arrijë në 1.76 miliardë dollarësh, sipas Shoqatës Amerikane të Lojërave të Fatit.
1.48 miliardë krahë pule do të hahen gjatë ndeshjes. Super Bowl 60 pritet të gjenerojë më shumë se 500 milionë dollarë për ekonominë lokale, me më shumë se 90,000 vizitorë nga jashtë Zonës së Gjirit të San Franciskos. ©Përgatiti LAPSI.al
