Një tërmet i fuqishëm goditi sot, më 8 shkurt, Kubën, duke shkaktuar frikë dhe panik tek banorët.
Sipas të dhënave paraprake, lëkundjet kishin një magnitudë prej 5.5 ballë të shkallës Rihter. Tërmeti u ndje në disa zona të vendit dhe u konsiderua i fortë, megjithatë deri tani nuk ka raportime për dëme materiale apo viktima.
Banorët shprehen të frikësuar jo vetëm për paslëkundje të mundshme, por edhe për rrezikun e një cunami, ndonëse autoritetet nuk kanë dhënë ende një alarm zyrtar në këtë drejtim.
Ngjarja vjen në një moment jashtëzakonisht të vështirë për Kubën. Pas rënies së regjimit në Venezuelë, vend që furnizonte ishullin me naftë dhe mbante në këmbë një pjesë të ekonomisë, Kuba po përballet me krizën më të thellë ekonomike të dekadave të fundit. Mungesa e energjisë, inflacioni dhe varfëria ekstreme kanë shtuar tensionin social.
Situata rëndohet edhe më tej nga presioni i vazhdueshëm politik ndërkombëtar. Presidenti amerikan Donald Trump ka paralajmëruar në mënyrë të përsëritur se regjimi kuban është drejt fundit, duke rritur pasigurinë për të ardhmen politike të vendit.
Në këtë sfond të rënduar ekonomik dhe politik, tërmeti i sotëm shton edhe një tjetër goditje për Kubën, në një moment kur shumëkush mendonte se situata nuk mund të përkeqësohej më tej. ©Lapsi.al
