Qeveria italiane ka blerë nga një shtëpi ankandesh në Nju Jork pikturën "Ecce Homo" të Antonello da Messina për 14.9 milionë dollarë. Konfirmimi erdhi nga shtëpia e njohur e ankandeve, “Sotheby's”. Piktura e vogël, e vitit 1460 e bërë nga autori si një krijim privat përshkruan një "Ecce Homo" në njërën anë dhe Shën Jeronimin në anën tjetër.
Fondacioni "Federico Zeri" i Bolonjës njoftoi se vepra e piktorit sicilian "është pronë e shtetit". Sipas thashethemeve, vepra pritej të dilte në ankand me një vlerësim prej 10-15 milionë dollarësh, por u ble nga shteti italian para se të fillonin ofertat.
“Është një pikturë e vogël në penel nga Antonello da Messina. Një nga veprat e pakta të sigurta të artistit. Një vepër e hershme ende e panjohur për literaturën e artit” – thuhet në njoftim.
Piktura kishte qëndruar prej vitesh në duar private. Ajo u tërhoq nga Sotheby's pak para se të dilte në ankand për shkak të interesit të fortë të treguar nga qeveria italiane.
Veprat e Antonello da Messina janë jashtëzakonisht të rralla. Vetëm rreth 40 piktura nga ky piktor kanë mbijetuar. Kjo është ndoshta e fundit që kishte mbetur në koleksione private. Të tjerat janë ekspozuar në muze. ©LAPSI.al
