Mali në fshatin Mifol të Novoselës ka rënë pre e një masakre mjedisore, ku koncesionari i Aeroportit të Vlorës po e rrafshon për t’i çuar materialet inerte në vendin ku po ndërtohet aeroporti.
Siç shihet edhe përmes pamjeve të siguruara nga News24 (VIDEO KETU) kompania 2A Group me pronar Valon Ademin, vijon gërryerjen e malit në Mifol me mjete të rënda, ku dheun e dërgon në fushën e kripores, vend në të cilin po ndërtohet Aeroporti i Vlorës.
Televizioni News24 raporton se firma 2A Group nuk ka asnjë leje nga institucionet qendrore, lokale apo mjedisore dhe skandali thellohet më tej për shkak se pushteti vendor nuk reagon, pavarësisht denoncimeve të vazhdueshme të banorëve të Novoselës.
Heshtja e institucioneve në Vlorë përballë shkelësve të ligjit nuk është rastësi. Valon Ademi, me kompaninë e tij 2A Group ka në pronësi vetëm 2% të aeroportit të Vlorës e megjithatë, institucionet shtetërore, përfshirë policinë dhe gjykatat janë paralizuar përballë tij.
Ademi ka në prapaskenë mbështetjen e Belinda Ballukut, një fakt që është arritur përmes lidhjeve të tij të biznesit me Arbër Abazin, një familjar i afërt i Ballukut pasi është bashkëjetues i vajzës së tezes së saj.
Më herët biznesmeni Arbër Abazi është vënë në shënjestër të hetimeve të SPAK për disa tendera që ka përfituar nga Ministria e Energjitikës, por lidhjet e tij me Valon Ademin janë shpjegimi më i mirë se përse institucionet në Vlorë sot heshtin përballë masakrës mjedisore që po ndodh ditën për diell.
Trekëndëshi Balluku-Abazi-Ademi/ E vërteta për bllokimin e aeroportit të Vlorës
Për më tepër, raporton News 24, nuk ka ende një dokumentacion zyrtar që të përcaktojë sa metra kub dhera do të merren dhe për sa kohë do të zgjasë kjo ndërhyrje.
Pavarësisht se nga njëra anë dy firmat, që përbëjnë edhe koncesionarin e Aeroportit të Vlorës kanë mosmarrëveshje për aksionet, me bllokime dhe vendime, në terren puna vijon në shkelje të plotë të lejeve mjedisore.
