Aktori James Van Der Beek, i njohur për publikun për rolin e tij në serialin ikonë “Dawson’s Creek”, ka ndërruar jetë në moshën 48-vjeçare pas një beteje me kancerin kolorektal.
Lajmin e hidhur e bëri të ditur bashkëshortja e tij, Kimberly Van Der Beek, përmes një deklarate të përbashkët në Instagram.
“James David Van Der Beek, i dashuri ynë, u nda nga jeta në paqe këtë mëngjes,” shkroi ajo.
“Ai i përballoi ditët e fundit me guxim, besim dhe dinjitet. Ka shumë për të ndarë për dëshirat e tij, dashurinë për njerëzimin. Ato ditë do të vijnë.”
Kimberly kërkoi gjithashtu privatësi për familjen në këtë periudhë zie.
Pas publikimit të lajmit, figura të njohura të showbiz-it shprehën ngushëllimet e tyre në rrjetet sociale. Hilaria Baldwin shkroi: “Po ju dërgoj shumë dashuri. Më vjen shumë keq.”
Aktorja Jamie-Lynn Sigler u shpreh: “Jemi me fat që ishim pjesë e rrethit të tij. Fluturo lart, James. Ti ishe gjithçka e mirë në këtë botë.”
Ndërsa Sarah Michelle Gellar reagoi me dhimbje: “Trashëgimia e James do të jetojë gjithmonë, por kjo është një humbje e madhe për familjen dhe për botën. Mallkuar qoftë kanceri.”
Edhe aktori Chad Michael Murray e cilësoi Van Der Beek si “një gjigant” dhe një frymëzim për të gjithë.
Van Der Beek ishte diagnostikuar me kancer në fazën e tretë në gusht të vitit 2023. Në nëntor 2024, ai zbuloi për revistën People se ishte detyruar ta bënte publike diagnozën pasi një tabloid po përgatitej ta publikonte lajmin.
“Kam qenë duke u përballur me këtë në mënyrë private deri tani, duke marrë trajtim dhe duke u fokusuar më shumë se kurrë në shëndetin tim,” ishte shprehur ai në atë kohë. “Jam në një vend të mirë dhe ndihem i fortë.”
James Van Der Beek u bë i famshëm në fund të viteve ’90 me rolin e Dawson Leery në “Dawson’s Creek”, ku luajti për gjashtë sezone përkrah Katie Holmes, Joshua Jackson, Michelle Williams dhe Busy Philipps.
Ai gjithashtu u shfaq në filmin “Varsity Blues” (1999), “The Rules of Attraction” (2002), serialin “CSI: Cyber”, si dhe pati role të shumta episodike në “How I Met Your Mother”, “Modern Family” dhe “Law & Order: Criminal Intent”.
Projekti i tij i fundit ishte “Sidelined 2: Interception”, i publikuar në vitin 2025.
