Lideri i opozitës ruse, Alexey Navalny, i cili vdiq dy vjet më parë, u helmua ndërsa ishte në burg. Helmi vinte nga nga një toksinë e gjetur në bretkosat helmuese në Amerikën e Jugut. Dy vjet pasi Konferenca e Sigurisë në Mynih u trondit nga lajmi për vdekjen në burg të kritikut të Kremlinit, shërbimet sekrete të pesë vendeve perëndimore deklaruan se opozitari rus u helmua me epibatidinë, një neurotoksinë vdekjeprurëse. Sipas tyre, vetëm shteti rus kishte mjetet, motivin dhe mundësinë për ta përdorur gjatë burgimit të tij në Siberi. Ata thonë se Rusia duhet të mbajë përgjegjësi për vdekjen.
Autoritetet ruse më herët e kishin atribuuar vdekjen e tij një “kombinimi sëmundjesh”. Ky pretendim që u prit me skepticizëm. Laboratorë nga Mbretëria e Bashkuar, Franca, Gjermania, Suedia dhe Holanda kanë gjetur gjurmë të toksinës në mostra indi të nxjerra fshehurazi nga Rusia. Sipas ekspertëve, substanca shkakton paralizë të shpejtë dhe insuficiencë respiratore, ndërsa simptomat e raportuara përputhen me efektet e saj.
Pesë vendet pritet t’i paraqesin gjetjet pranë Organizata për Ndalimin e Armëve Kimike, duke akuzuar Rusinë për shkelje të detyrimeve ndërkombëtare. Moska e ka hedhur poshtë deklaratën.
Zëdhënësja e Ministrisë së Jashtme ruse, Maria Zakharova, e cilësoi atë si mashtrim të propagandës perëndimore. Ajo deklaroi se një reagim zyrtar do të vijë vetëm pasi të bëhen publike rezultatet dhe formulat e substancave të përmendura.
Ndërkohë, presidenti ukrainas Volodymyr Zelensky u shpreh në Mynih se nuk mendon se Vladimir Putin mund të ketë plane për ta helmuar atë.
"Nuk mund të mendoj për Vladimir Putinin dhe planet e tij për të më helmuar, nëse ka ndonjë. Përpiqem të mos mendoj për këtë. Përndryshe do të mendoja vetëm për këtë gjë", deklaroi Zelensky për gazetarët në Konferencën e Sigurisë në Mynih.
©Lapsi.al
