Sfida e javës së 24-të në Superiore mes Egnatias dhe Vorës përfundoi me një rezultat befasues 1-1, duke tronditur kampionët në transfertë.
Egnatia kaloi e para në avantazh që në minutën e 18-të. Fernando shënoi nga penalltia pas vendimit të gjyqtarit Koçi, i cili përdori VAR për të konfirmuar situatën.
Megjithatë, reagimi i Vorës nuk vonoi. Në minutën e 86-të, Kasalla barazoi shifrat duke siguruar një pikë të çmuar në përpjekjen për mbijetesë.
Trajneri Bellaj: “Dominuam Egnatian në pjesën e dytë”
Pas ndeshjes, trajneri i Vorës, Arjan Bellaj, u shpreh i kënaqur me performancën e ekipit:
"Jam shumë i kënaqur, i përgëzoj çunat. Në pjesën e parë na dominoi Egnatia, por në pjesën e dytë kemi dominuar ne. Ndërrimet e bëra direkt, si Felipe dhe Sefa, na ndihmuan në mbajtjen e topit dhe në markime. Të dominosh Egnatian 20-25 minuta në pjesën e dytë tregon se çunat kanë bërë mirë. Kështu duhet të luajmë gjithmonë, si me Egnatian ashtu edhe me ekipet me të cilat luftojmë për mbijetesë."
Pas këtij rezultati, Egnatia mbetet 2 pikë pas Vllaznisë, që do të ndeshet nesër me Elbasanin. Ndërkohë, Vora qëndron në vendin e shtatë, 5 pikë larg Tiranës, që do të luajë nesër derbin kundër Partizanit.
[video width="640" height="360" mp4="https://cdnimpuls.com/lapsi.al/wp-content/uploads/2026/02/69906f5c00c9a.mp4"][/video] [video width="662" height="360" mp4="https://cdnimpuls.com/lapsi.al/wp-content/uploads/2026/02/6990883712ac9.mp4"][/video]
