Sekretari amerikan i Shtetit, Marco Rubio, nisi të dielën një vizitë dyditore në Evropën Lindore, me ndalesa në Sllovaki dhe Hungari, me synimin për të forcuar marrëdhëniet dypalëshe, raporton Reuters.
Sipas njoftimit të Departamentit amerikan të Shtetit, Rubio pritet të diskutojë bashkëpunimin në fushën e energjisë dhe çështje të tjera dypalëshe, përfshirë angazhimet në kuadër të NATO.
Dy vendet drejtohen nga liderë konservatorë, të cilët shpesh kanë pasur qëndrime të ndryshme nga shumica e vendeve të Bashkimit Evropian dhe konsiderohen të afërt me Presidentin amerikan Donald Trump.
“Këto janë vende shumë të forta me ne, shumë bashkëpunuese me Shtetet e Bashkuara dhe punojnë ngushtë me ne”, u shpreh Rubio përpara nisjes drejt Evropës.
Në Bratislavë, Rubio u takua me Presidentin sllovak Peter Pellegrini, në vizitën e parë të një sekretari amerikan të Shtetit në Sllovaki pas shtatë vitesh.
Sipas njoftimit të presidencës sllovake, në fokus të bisedimeve ishin energjia dhe bashkëpunimi në mbrojtje, si dhe përmbushja e angazhimeve që burojnë nga samitet e NATO-s.
Më pas, kryediplomati amerikan zhvilloi një takim edhe me kryeministrin sllovak Robert Fico, i cili muajin e kaluar vizitoi Trump në Florida. Vizita e Rubios në rajon vjen pas pjesëmarrjes së tij në Konferencën e Sigurisë në Mynih gjatë ditëve të fundit.
