Babai po shtynte karrocën e pazarit ndërsa nëna po mbante vajzën 1 vjeç e gjysmë për dore. Në dyqanin “Esselunga” në Via Corridoni në Bergamo, një e shtunë e zakonshme familjare u ndërpre nga një skenë që do të tmerronte çdo prind. Teksa familja po shkon drejt dyerve të daljes, një person i panjohur u preu rrugën pranë derës prej xhami. Skena zgjat 20 sekonda, por është e mjaftueshme për të tronditur prindërit, klientët dhe stafin.
Ishte ora 13:00 kur kamerat, e sekuestruara tashmë nga policia, kanë fiksuar gjithçka.
Personi, një 47-vjeçar rumun pa adresë fikse, tentoi të rrëmbejë vajzën e vogël. Nëna nuk e priste, por nuk u tërhoq. I panjohuri, i veshur me pantallona jeshile dhe një xhaketë blu, e kapi vajzën e vogël nga këmba e djathtë.
Nëna reagoi menjëherë. 47-vjeçari e tërhoqi vajzën e vogël në supermarket, duke e zvarritur brenda. Nëna nuk e lëshoi dhe duke dashur ta mbante nën kontroll u zvarrit përtokë. Agresori u ndal nga burri i saj dhe më pas nga persona të tjerë. Vajza e vogël mbeti me nënën e saj, por më vonë u dërgua në Spitalin Papa Giovanni XXIII me një femur të thyer. Ato pak sekonda duhet t'i jenë dukur të pafundme nënës dhe babait të vajzës së mitur.
Babai braktisi menjëherë karrocën e pazarit dhe e goditi burrin 47-vjeçar në shpinë, duke e rrëzuar përtokë. Një roje sigurie që qëndronte në hyrje të supermarketit dhe disa klientë u hodhën shpejt mbi sulmuesin. 47-vjeçari u kap dhe iu dorëzua policisë.
Tashmë janë duke u sqaruar disa elementë të ngjarjes siç është motivi i burrit për të rrëmbyer vajzën e vogël. Nuk duket se ai e njihte familjen (si prindërit ashtu edhe fëmija janë italianë). Ai nuk duket se ka precedentë penalë. Nuk dihet as të ketë ndonjë çrregullim psikiatrik të certifikuar, megjithëse priten hetime të mëtejshme.
Duket se rumuni kishte bredhur nëpër Itali për njëfarë kohe, dhe aktualisht nuk dihet pse ose sa kohë kishte qenë në Bergamo. Ajo që është e sigurt është se ai do të qëndrojë në qeli për momentin. Prokurorja Giulia Angeleri ka urdhëruar transferimin e tij në burg dhe në ditët në vijim do t'i kërkojë gjyqtarit të hetimeve paraprake të konfirmojë arrestimin e tij për tentativë rrëmbimi. ©LAPSI.al
