Presidenti i SHBA-së, Donald Trump, tha të dielën se shtetet anëtare të “Board of Peace” kanë premtuar më shumë se 5 miliardë dollarë, rreth 4.2 miliardë euro, për rindërtim dhe përpjekje humanitare në Gaza.
Në një postim në platformën e tij Truth Social, presidenti amerikan njoftoi se do t’i zbulojë zyrtarisht këto angazhime kur bordi të mblidhet të enjten në Uashington.
Ngjarja pritet të tërheqë delegacione nga më shumë se 20 vende, përfshirë edhe krerë shtetesh.
Rindërtimi i Gazës pritet të kushtojë 70 miliardë dollarë, sipas vlerësimeve të Kombeve të Bashkuara, Bankës Botërore dhe Bashkimit Evropian, pas më shumë se dy vitesh lufte.
Armëpushimi i ndërmjetësuar nga SHBA-ja më 10 tetor parashikon një forcë të armatosur ndërkombëtare për të garantuar sigurinë dhe për të çarmatosur Hamasin, por pak vende kanë shprehur interes.
Trump shkroi se shtetet anëtare të bordit janë angazhuar me mijëra efektivë për forcën ndërkombëtare të stabilizimit dhe policisë të autorizuar nga OKB-ja në enklavën palestineze, duke e quajtur bordin “organismi ndërkombëtar më i rëndësishëm në histori”. Ai nuk përmendi se cilat vende planifikojnë të kontribuojnë.
Megjithatë, ushtria e Indonezisë konfirmoi të dielën se pret të ketë deri në 8 mijë trupa gati deri në fund të qershorit për një mision të mundshëm paqeje dhe humanitar, duke shënuar angazhimin e parë konkret për forcën e propozuar.
Trump i bën thirrje Hamasit të çarmatoset
Trump po ashtu po i kërkon Hamasit të ecë përpara me çarmatimin e plotë sipas planit të tij të pasluftës për Gazën.
“Shumë e rëndësishme, Hamasi duhet të respektojë angazhimin e tij për çarmatim të plotë dhe të menjëhershëm,” shkroi ai në postimin në Truth Social.
Çarmatimi është një pjesë kyçe e fazës së dytë të planit të armëpushimit të ndërmjetësuar nga SHBA-ja, për të cilin u ra dakord në tetor mes Izraelit dhe Hamasit. Ky plan synon t’i japë fund konfliktit që nisi pasi Hamasi sulmoi Izraelin në tetor 2023.
Faza e dytë parashikon tërheqjen graduale të forcave izraelite nga Gaza dhe çarmatimin e Hamasit. Një forcë ndërkombëtare stabilizuese do të dislokohet për të garantuar sigurinë.
Megjithëse Hamasi ka sinjalizuar se mund të shqyrtojë dorëzimin e armëve tek një autoritet i ardhshëm qeverisës palestinez, ai ka deklaruar vazhdimisht se çarmatimi është një vijë e kuqe.
Të dyja palët akuzojnë njëra-tjetrën çdo ditë për shkelje të armëpushimit. Sipas Ministrisë së Shëndetësisë në Gaza, trupat izraelite kanë vrarë më shumë se 590 palestinezë në territor që nga fillimi i armëpushimit. Gjatë së njëjtës periudhë, Izraeli raportoi se katër ushtarë të tij u vranë nga militantë palestinezë./DW
