Një 47-vjeçar shqiptar i cili ishte në kërkim prej 13 vitesh nga Greqia, është kapur sapo vuri këmbën në aeroportin e Riminit në Itali. Mediat italiane shkruajnë se arratisja e tij përfundoi pasditen e 17 shkurtit, kur policia e gjurmoi sapo zbriti nga avioni që mbërrinte nga Shqipëria.
47-vjeçari shqiptar ishte subjekt i një urdhër-arresti evropian të lëshuar nga autoritetet gjyqësore greke, për akuzën e vrasjes dhe tentativës së vrasjes, të kryer në vitin 2012. Ngjarja me armë zjarri ka ndodhur në Agios Panteleimon, një vendpushim bregdetar popullor në Greqinë lindore, jo shumë larg Athinës.
Pas vrasjes së një bashkëatdhetari të tij dhe plagosjes së rëndë të një tjetri, 47-vjeçari u zhduk duke humbur gjurmët mes Greqisë dhe Shqipërisë.
Falë përpjekjeve hetimore të policisë kufitare të Riminit, i kërkuari u kap pasi fluturimi i tij nga Tirana zbarkoi në Rimini.
“Oficerët e policisë kufitare të Riminit, tashmë në gatishmëri në orët para uljes së fluturimit nga Tirana, pritën avionin në pistë. Sapo pasagjeri kaloi kontrollin e dokumenteve (ai po udhëtonte me një pasaportë të vlefshme), ai u ndalua. Burri nuk bëri rezistencë dhe u dërgua në zyrat e Policisë Kufitare për procedurat e identifikimit dhe më pas u transferua në burgun e Riminit, në pritje të një seance dëgjimore para Gjykatës së Apelit të Bolonjës, e cila ka juridiksion mbi ekstradimin”, - raportojnë mediat italiane.
Tashmë duhet që autoritetet greke të formalizojnë kërkesën për dorëzim me qëllim ekstradimi. Në ditët në vijim, gjyqtarët e Gjykatës së Apelit të Bolonjës do të vlerësojnë nëse plotësohen kushtet. /LAPSI.al
