"Kur mortja e shtyn qenërinë tek dera e xhamisë…" Është ky komenti që ka bërë kryeministri Edi Rama pas protestës së opozitës mbrëmjen e kësaj të premteje. Rama duket se akuzon opozitën se i ka shtyrë protestuesit drejt xhamisë a thua se ishin protestuesit që hodhën gazin lotsjellës.
Më herët edhe ministrja e Brendshme Albana Koçiu bëri fajtore protestuesit dhe opozitën për gazin që mbuloi besimtarët në xhami.
"Sot kryeqyteti u nda në dy realitete që nuk kanë asgjë të përbashkët. Nga njëra anë, përulësia e besimtarëve që kërkojnë paqe; nga ana tjetër, banda e çadrave dhe e molotovit që me maska në fytyrë nxisin dhunë. Ndërkohë që dëgjohet lutja, ulërijnë britmat për shkatërrim.
Është një kontrast që të lë pa fjalë: Lutja përballë mallkimit. Qytetaria përballë vandalizmit.
Përballë kësaj marrëzie që djeg qytetin për hallin e karriges së një njeriu, duke u kërkuar ndjesë besimtarëve që ishin aty në ritualin e lutjeve e u përballën me situatën e gazit lotsjellës, mbetet të themi vetëm një fjali: Fali Zot, se nuk dinë ç’bëjnë!" - shkruan Koçiu. /LAPSI.al
