Presidenti francez Emmanuel Macron i ka shkruar Donald Trump duke kërkuar heqjen e sanksioneve të vendosura padrejtësisht kundër zyrtarëve evropianë, përfshirë ish-komisionerin francez për BE-në Thierry Breton dhe gjyqtarin francez Nicolas Guillou.
“Personalisht, do të doja t’ju tërhiqja vëmendjen te sanksionet e vendosura nga SHBA-të kundër shtetasve evropianë, përfshirë dy francezë: Nicolas Guilloux, gjyqtar në Gjykatën Ndërkombëtare Penale, dhe Thierry Breton, ish-Komisioner Evropian. Ju kërkoj të rishqyrtoni këto vendime të qeverisë suaj dhe të hiqni sanksionet e vendosura padrejtësisht kundër Nicolas Guillou dhe Thierry Breton”, i shkroi presidenti francez homologut të tij amerikan.
Thierry Breton, i cili akuzohet nga Departamenti i Shtetit për "censurë" kundër interesave amerikane, i është ndaluar hyrja në Shtetet e Bashkuara që nga dhjetori i vitit 2025. Francezi ishte pionieri i Aktit Evropian të Shërbimeve Dixhitale (DSA), i cili vendos rregullore mbi platformat, të tilla si sinjalizimi i përmbajtjes problematike, të cilën Shtetet e Bashkuara e konsiderojnë një shkelje të lirisë së shprehjes.
Sekretari i Shtetit i SHBA-së, Marco Rubio, me vendosjen e këtyre sanksioneve, kishte folur për "akte flagrante të censurës ekstraterritoriale".
“Sanksionet e vendosura ndaj Thierry Breton minojnë autonominë rregullatore evropiane dhe, për më tepër, bazohen në një analizë të gabuar: rregulloret dixhitale evropiane nuk kanë zbatim jashtëterritorial dhe zbatohen pa diskriminim, brenda territorit evropian, për të gjitha kompanitë e përfshira”, u përgjigj Macron në letrën e tij drejtuar Trump.
Lidhur me gjyqtarin Nicolas Guillou, ai u sanksionua nga Uashingtoni në gusht 2025, së bashku me gjyqtarë të tjerë të GJND-së, për përfshirjen e tij në çështjen që lidhet me urdhrin e arrestit të lëshuar nga Gjykata kundër kryeministrit izraelit Benjamin Netanyahu.
