Qeveria nuk di të thotë kur do të rikthehet qarkullimi normal në aksin Librazhd-Përrenjas pas rrëshqitjes masive të rrugës. Në një konferencë për mediat, kreu i ARRSH, Ami Kozeli, tha se rruga do të rikthehet në funksion pas normalizimit të situatës, por pa dhënë asnjë afat konkret. Bashkë me të ishin 8 zyrtarë në një konferenë për mediat thjesht për të thënë që ishte fatkeqësi natyrore, por jo për të dhënë zgjidhje.
"Në mbledhjen e djeshme, datë 24 shkurt, u morën këto vendime: Ndërtimi i një rruge të re alternative përgjatë hekurudhës në shtratin e lumit Shkumbin. Prishja e urës ekzistuese dhe lehtësimi i ngarkesës në rrugën e rrëshqitur deri në ndërtimin e një skarpate natyrale. Sistemi dhe disiplinimi i urave sipërfaqësore në të gjithë zonën e planit të rrëshqitjes. Aksi Librazhd–Prrenjas është me rëndësi strategjike dhe do të rikthehet në funksion të plotë pas sigurimit të situatës",- tha Kozeli.
Prej disa ditësh aksi Librazhd-Përrenjas është i pakalueshëm. Gjithë zona e juglindjes së vendit mbetet e izoluar.
