Ish-Presidenti i SHBA-së, Bill Clinton, pritet të dëshmojë sot me dyer të mbyllura para komisionit të Dhomës së Përfaqësuesve që po heton rastin e Jeffrey Epstein, ndërsa demokratët kërkojnë të përqendrojnë vëmendjen te lidhjet e financierit dhe të dënuarit për abuzues seksual me Presidentin Donald Trump.
Emri dhe fotografi të reja të deklasifikuara të Bill Clinton janë shfaqur në dokumente që lidhen me hetimin e aktiviteteve kriminale të Jeffrey Epstein, ndërsa ish-presidenti amerikan nuk është akuzuar për asnjë vepër penale. Clinton, ashtu si edhe Donald Trump, kishte marrëdhënie shoqërore me financierin e Nju Jorkut dhe kishte udhëtuar disa herë me avionin e tij privat në fillim të viteve 2000, pas largimit nga Shtëpia e Bardhë.
Në fotot e publikuara së fundmi nga Departamenti i Drejtësisë i SHBA, Clinton shfaqet në evente shoqërore dhe ambiente private me Epstein, në disa raste pranë grave me fytyra të mbuluara. Në një prej imazheve ai duket në një xhakuzi.
Clinton ka deklaruar vazhdimisht se nuk kishte dijeni për krimet e Epstein, i cili në vitin 2008 u deklarua fajtor për nxitjen e një të miture për prostitucion dhe vuajti 18 muaj burg. Në vitin 2019, kur Epstein u gjet i vdekur në qelinë e tij, ish-presidenti tha se nuk kishte folur me të për më shumë se një dekadë.
Ndërkohë, Hillary Clinton dëshmoi për rreth gjashtë orë para një komiteti të udhëhequr nga republikanët, duke theksuar se nuk kujton të ketë takuar ndonjëherë Epstein dhe nuk ka dijeni për krimet e tij. Ajo akuzoi komitetin se po përpiqet të largojë vëmendjen nga lidhjet e Trump me Epstein.
Dëshmia e Clintonëve i jep fund muajsh përplasje me kryetarin republikan të komitetit, James Comer. Fillimisht çifti refuzoi të paraqitej, por pas kërcënimeve për procedura për shpërfillje të gjykatës, ata pranuan të dëshmojnë. Transkripti i plotë i deklaratave pritet të publikohet pas dëshmisë së Bill Clinton.
