Një aksident rrugor është regjistruar rreth orës 10:00 në autostradën që lidh Fierin me Vlorën, pranë fshatit Panaja.
Në aksident janë përfshirë dy automjete, një mjet tip “Mercedes” dhe një mjet tip “Volkswagen Passat”. Sipas informacioneve paraprake, të dy automjetet po lëviznin në drejti të qytetit të Vlorës, kur mjeti tip “Mercedes” dyshohet se i ka prerë rrugën automjetit tjetër.
Si pasojë e përplasjes, automjeti “Mercedes”, ka dalë nga rruga dhe ka përfunduar në anë të kanalit. Ndërkohë, edhe mjeti “Passat”, ka dalë nga rruga dhe ka përfunduar në anë të autostradës.
Fatmirësisht, katër personat që udhëtonin në të dyja automjetet nuk kanë pësuar lëndime. Megjithatë, dëmet materiale në të dy mjetet janë të konsiderueshme.
Dy personat që ndodheshin në automjetin “Mercedes” janë shoqëruar për kontroll mjekësor në spitalin e Vlorës. Ndërkohë, policia ka mbërritur në vendngjarje dhe po kryen veprimet hetimore, përfshirë matjet dhe ekspertizën teknike, për të përcaktuar shkaqet e aksidentit.
