Reza Pahlavi, djali i Shahut të fundit të Persisë, ishte shumë entuziast për mundësinë që Gjermania të fillonte veprime agresive kundër regjimit në Teheran dhe e mirëpriti këtë mundësi.
Por bashkëbiseduesit e tij nuk ishin përfaqësues të Kancelarit gjerman, Friedrich Merz, siç iu paraqitën atij, por shakaxhinj rusë.
Bëhet fjalë për dyshen e njohur, Vovan dhe Lexus që kanë futur në kurthin e tyre politikanë të shumtë. Theksi i tyre është karakteristik rus, por njëri prej të dyve e prezantoi veten si... "Adolf", madje duke mbajtur një paruke dhe mustaqe që të kujtonin Hitlerin.
E megjithatë, Pahlavi që shpreson të rikthehet në Iran pas sulmit izraelito-amerikan ra në kurth.
Ai u shfaq shumë entuziast për mundësinë që Gjermania të fillonte bombardimet së bashku me SHBA-në dhe Izraelin (biseda është bërë para se të fillonte sulmi më 28 shkurt).
Është e rëndësishme që SHBA-të dhe Izraeli të mos jenë të izoluar “në këtë kryqëzatë”, tha ai dhe shprehu gëzim që Gjermania po mban një “qëndrim të ashpër” ndaj Iranit.
Sa i përket të ardhmes, Pahlavi deklaron se është gati: “Kur ky regjim të bjerë më në fund, ne jemi gati të mbushim boshllëkun që është krijuar”. ©LAPSI.al
