Seanca gjyqësore në ngarkim të Plarent Dervishaj dhe Julian Meçaj, të akuzuar për atentatin ndaj ish-prokurorit Arjan Ndoja dhe Aleksandër Lahos në 1 nëntor 2019 në mbikalimin e Shkozetit ka vijuar ditën e sotme në GJKKO. Mësohet se në sallën e gjyqit u paraqitën disa prova shkresore, të cilat kanë të bëjnë me disa komunikime në Sky Ecc. Po ashtu prokurori Adnan Xholi listoi para gjykatës të gjitha kodet e Sky Ecc të përdorura nga grupi kriminal.
Xholi shpjegoi dhe mënyrën se si u verifikua kodi i Sky Ecc të Plarent Dervishajt. Sipas tij, në bazë të disa komunikimeve u zbulua se llogaria në fjalë ishte e të pandehurit Dervishaj.
Në monitorin e GJKKO u paraqiten disa komunikime, fotografi dhe pamje te shkëmbyera mes Dervishajt dhe përdoruesve të tjerë të Sky Ecc. Pasi u lexuan kodet e Sky Ecc, prokurori kërkoi që seanca të vijoje me dyer të mbyllura pasi do të lexohen disa komunikime që përbejnë sekret hetimor.
Si ndodhi atentati?
Atentati ndaj prokurorit Ndoj ndodhi në datën 1 nëntor të vitit 2019 pranë mbikalimit të Shkozetit, ku si pasojë ka mbetur i vdekur shoferi i hetuesit Andi Maloku. Arjan Ndoja, bashkë me Landi Muharremin (Aleksandër Laho), dhe Andi Maloku ishin duke drekuar në zonën e plazhit në Durrës. Të tre, u nisën drejt Tiranës pas drekës dhe në zonën e mbikalimit të Shkozetit, u qëlluan nga një makinë Benz, në ecje, ku dyshohet se ka qenë brenda Redjan Rraja. Për pasojë u plagosën të tre, por në gjendje më të rëndë ishte Andi Maloku, i cili u bë mbrojtja e prokurorit Ndoja në atentat. Për shkak të plagëve të shumta, ai ndërroi jetë në spitalin e Traumës në Tiranë.
