Joey Barton është arrestuar nga autoritetet e Merseyside pas një sherri të dyshuar pranë Huyton and Prescot Golf Club. Ish-futbollisti akuzohet se ka plagosur një burrë në fytyrë dhe në brinjë gjatë një përleshjeje të ndodhur të dielën në klubin e golfit. Ai është arrestuar bashkë me një person tjetër, identiteti i të cilit nuk është bërë i ditur, sipas raportimit të Daily Mail. Akuza zyrtare është agresion, por sipas hetimeve të para ekziston edhe mundësia që Barton të ketë vepruar në vetëmbrojtje, pasi raportohet se jashtë ndërtesës ishte nxjerrë një armë.
Çfarë ndodhi
Debati filloi në një klub golfi pranë Liverpool, të cilin ish-futbollisti e frekuenton. Sipas rindërtimeve të para të autoriteteve, agresioni ndodhi rreth orës 21:00 të së dielës, më 8 mars. Shërbimet e emergjencës u thirrën menjëherë pas raportimit për një burrë të sulmuar pranë klubit të golfit, i cili u dërgua në spital me plagë në fytyrë dhe në brinjë. Në pranga përfunduan një 40-vjeçar dhe një 43-vjeçar, dhe besohet se njëri prej tyre është pikërisht Barton. Një avokat në Gjykatën e Lartë konfirmoi arrestimin dhe ndalimin e ish-futbollistit.
Një zëdhënës i policisë konfirmoi arrestimet dhe shtoi se të dy të ndaluarit ndodhen aktualisht në paraburgim dhe do të merren në pyetje nga hetuesit për të sqaruar dinamikën e ngjarjes. Nuk përjashtohet mundësia që Barton të ketë vepruar në vetëmbrojtje pasi ka parë armën që dyshohet se është nxjerrë nga viktima, në një kontekst ende të paqartë. Ky episod është vetëm një tjetër kapitull i sjelljeve problematike të Barton, i cili gjatë karrierës së tij fitoi reputacionin e një “bad boy” të futbollit: si lojtar është përfshirë shpesh në sulme ndaj tifozëve dhe shokëve të skuadrës dhe madje ka kaluar 77 ditë në burg për rrahjen e dhunshme të një të riu.
