Presidenti i Shteteve të Bashkuara, Donald Trump, thuhet se po praktikon një zakon të veçantë. Ai u dhuron modelin e tij të preferuar të këpucëve të lira prej lëkure bashkëpunëtorëve, zyrtarëve dhe vizitorëve të Shtëpisë së Bardhë.
Sipas një raporti të “Wall Street Journal”, Trump ka filluar t’u ofrojë këpucë nga kompania Florsheim, një prodhues këpucësh me seli në Wisconsin, zyrtarëve qeveritarë dhe vizitorëve të rangut të lartë, pasi duket se është impresionuar nga marka.
Ata që i marrin këpucët shpesh sigurohen t’i veshin kur janë pranë Trump, edhe nëse nuk e bëjnë këtë me entuziazëm. Çmimi i tyre varion rreth 145 dollarë (gjatë uljeve mund të bjerë edhe në 59.90 dollarë) gjë që i bën ato mjaft të përballueshme krahasuar me markat luksoze.
“Është për të qeshur sepse të gjithë kanë frikë t’i veshin”, tha një person që kishte dijeni për situatën. “Të gjithë burrat i kanë”, - tha një tjetër. Sipas të njëjtit raport, Trump shpesh ndërpret diskutimet në takimet zyrtare për të lavdëruar këpucët "e pabesueshme" ose për të pyetur bashkëpunëtorët nëse i kanë marrë tashmë një palë.
Kush i ka marrë këpucët?
Midis atyre që thuhet se kanë marrë këpucë të tilla janë zv.Presidenti i SHBA-së J.D. Vance, Sekretari i Shtetit Marco Rubio, Sekretari i Mbrojtjes Pete Hegseth, Sekretari i Tregtisë Howard Latnick, Drejtori i Komunikimit Stephen Cheung dhe Sekretari i Transportit Sean Duffy. Mes marrësve thuhet se janë edhe senatori i Karolinës së Jugut Lindsey Graham, komentatori Tucker Carlson dhe prezantuesi i Fox News, Sean Hannity.
Në një takim në Zyrën Ovale dhjetorin e kaluar, thuhet se Trump komentoi këpucët e ndihmësve të tij. “Marco, JD, keni këpucë shumë seksi”, - tha ai, duke iu drejtuar Vance dhe Rubios.
"Obsesioni" me këpucët
Sipas raportit, Trump pati një preferencë të veçantë për këpucët Florsheim në fund të vitit 2025, kur po kërkonte këpucë më të rehatshme që mund t’i përballonin orarit të ngarkuar të presidencës. Vance tha se Trump në një moment nxori një katalog kompanie dhe u kërkoi të gjithëve t’i tregonin numrin e këpucëve.
Një ministër thuhet se madje u ankua se ishte detyruar të vishte Florsheim në vend të këpucëve të tij të zakonshme Louis Vuitton. Thomas Florsheim Jr., CEO i kompanisë mëmë të Florsheim, tha se nuk ishte në dijeni të preferencave të Trump dhe nuk pranoi të komentojë më tej. ©LAPSI.al
