Një projekt për ndërtimin e një resorti rreth 10 milionë euro në Qerret të Kavajës ka ngritur dyshime për një zinxhir shkeljesh ligjore dhe lidhje të mundshme me drejtoreshën e Tatimeve të Tiranës, Erilinda Lala, dhe bashkëshortin e saj, Taulant Godroli.
Më 16 dhjetor 2024, drejtoresha aktuale e Drejtorisë Rajonale të Tatimeve Tiranë, Erilinda Lala, do t’i dhuronte aksionet e veta brenda kompanisë “2D Construction 2025”, ish-“Gea Construction”, ortakes Marsida Dedej, me miratimin e bashkëshortit të saj, Taulant Godroli.
Sipas kërkimeve të “Vetting”, dyshohet se Lala mund të ketë fshehur pasuri në deklarimet pranë ILDKPKI-së, për të mos ekspozuar lidhjet e mëparshme me kompaninë që ka përfituar lejen e ndërtimit për resortin.
Projekti, i parashikuar vetëm 200 metra nga bregdeti i Qerretit, rezulton në kundërshtim me Planin e Përgjithshëm Vendor të Bashkisë Kavajë, i cili përcakton kufizimet e zhvillimit urban në zonë.
Kompania “2D Construction 2025”, ish-“Gea Construction”, u krijua në qershor 2023 dhe fillimisht kishte si bashkëthemeluese Erilinda Lalën dhe Marsida Dedej me nga 50% të aksioneve. Pavarësisht se ishte një kompani e re dhe pa aktivitet të dukshëm financiar, ajo u pajis me licencë për punime ndërtimi nga Ministria e Infrastrukturës dhe Energjisë në fillim të vitit 2024.
Të dhënat financiare tregojnë se kompania nuk ka deklaruar të ardhura dhe ka operuar me humbje, ndërsa në deklarimin e pasurisë Lala ka raportuar rreth 40 mijë euro të ardhura nga biznesi gjatë vitit 2023, pa specifikuar burimin e tyre.
“Vetting” ka kërkuar shpjegime nga ILDKPKI, por institucioni i drejtuar nga Evgjeni Bashari nuk ka dhënë koment deri në publikimin e materialit.
