Policia e shtetit njofton se ka referuar materialet në Prokurori dhe ka shpallur në kërkim shtetasen M.D., 40 vjeçe, banore e Korçës, e dyshuar për kryerjen e veprës penale “Braktisja e fëmijëve të mitur”.
Burime zyrtare bëjnë me dije se foshnja e saj, vetëm disa muajshe, është braktisur rreth 4 ditë më parë dhe është lënë në kujdesin e gjyshes, ndërkohë që vendndodhja e saj aktuale mbetet e paqartë.
Policia e Korçës ka dhënë sot detajet e para hetimore për ngjarjen e ndodhur dje, ku foshnja e sapolindur, vetëm 2-muajshe u dërgua fillimisht në Pediatrinë e Spitalit të Korçës në gjendje të rëndë dhe më pas u nis drejt Tiranës për mjekim të specializuar.
Familjarët nga një fshat i Devollit e sollën me urgjencë për trajtim në gjendje të rëndë fëmijën, teksa nga verifikimet dhe marrja në pyetje e mjekëve rezultoi se foshnja kishte lindur para kohe.
Kjo i ka shkaktuar edhe simptoma shëndetësore, kryesisht në organet e frymëmarrjes, në probleme respiratorë.
“Më 13 mars, në spitalin Pediatrik Korçë, i shoqëruar nga prindërit ka shkuar për mjekim në gjendje të rëndë shëndetësore, një foshnjë 2-muajshe, banues në një fshat të rrethit Devoll. Nga veprimet e kryera dhe deklarimet e familjarëve, rezulton se foshnja ka lindur para kohe dhe me probleme respiratorë”, thuhet në njoftimin zyrtar të lëshuar sot (14 mars).
Më tej sqarohet se “pas trajtimit në spitalin Pediatrik të Korçës, u dërgua në Tiranë, për mjekim të specializuar”.
Aktualisht fëmija vijon të mbahet nën kujdes intensiv nga mjekët pediatër të kryeqytetit.
Hetimet vijojnë bashkë me prokurorinë vendore, për sqarimin e plotë të ngjarjes.
Policia po punon intensivisht për kapjen e 40-vjeçares, ndërsa fëmija rrezikon të qëndrojë pa kujdesin e prindit, sipas të dhënave zyrtare.
