Inter ka vendosur të festojë historinë e tij të mrekullueshme, të mbushur me suksese në Itali dhe në Europë, me një libër që do të jetë për shumë pak njerëz. Kjo para së gjithash sepse 118 vitet e historisë zikaltër janë përmbledhur në vetëm 118 kopje të numëruara me dorë. Dhe sepse ky libër kushton 19 mijë euro, është i dekoruar me stemën e realizuar në argjend sterling të veshur me ar 22 karatësh. Ky libër peshon 34 kilogramë.
Vetëm 118 kopje të numëruara me dorë
Inter ka prezantuar zyrtarisht: ‘Inter The Opus 118 Marquee Edition’, një festim i jashtëzakonshëm i 118 viteve histori të klubit. Ekzistojnë vetëm 118 kopje të numëruara me dorë. Brenda janë përjetësuar triumfet më të bukura të klubit, momentet e paharrueshme brenda dhe jashtë fushës. Ekipi krijues Opus ka punuar në bashkëpunim me ata që merren me arkivin e Inter dhe ka krijuar një homazh luksoz për klubin që kryeson Serie A. Në arkiva janë gjetur fotografi dhe dokumente që nuk ishin publikuar kurrë më parë.
Libri që feston historinë e Inter dhe peshon 34 kilogramë
Përveç kësaj, ka edhe fotografi të futbollistëve të ekipit të parë aktual dhe të legjendave zikaltër, të realizuara në ultra-HD. Ky është libri i parë i këtij lloji i dedikuar një skuadre të Serie A nga Opus. Vëllimi i parë italian i futbollit për Opus Collection. Inter The Opus 118 Marquee Edition është një objekt koleksioni, por kushton edhe shumë, pasi është realizuar në argjend sterling të veshur me ar 22 karatësh, të vendosur në një kopertinë madhështore të punuar me dorë. Libri do të përfundojë në fund të sezonit, në mënyrë që të përfshijë edhe materialet e sezonit 2025-2026. Kushton 19.080 euro dhe peshon mbi 34 kilogramë, duke qenë i përbërë nga më shumë se 800 faqe.
