Princ Harry dhe Meghan Markle kanë reaguar ndaj disa pjesëve të publikuara nga një libër i ri mbi familjen mbretërore britanike, të cilat përmbajnë akuza të forta ndaj tyre.
Libri i ri me titull Betrayal: Power, Deceit and the Fight for the Future of the Royal Family, i shkruar nga Tom Bower, pretendon se Queen Camilla i kishte thënë privatisht një miku se Meghan kishte “shplarë trurin” e Harry-t gjatë përplasjes me familjen mbretërore.
Sipas librit, lidhja mes Harry-t dhe Meghan-it kishte shqetësuar gjithashtu Prince William dhe Catherine, Princess of Wales, të cilët dyshohet se mendonin se princi ishte nën ndikimin e dukeshës dhe se marrëdhënia e tyre po zhvillohej shumë shpejt. Autori pretendon gjithashtu se tensionet mes dy çifteve mbretërore u përshkallëzuan deri në një përballje të tensionuar.
Në reagimin e tyre për mediat, një zëdhënës i çiftit i cilësoi pretendimet si të pabaza.
“Komentet e zotit Bower kanë kaluar prej kohësh kufirin nga kritika në një fiksim,” tha zëdhënësi, duke shtuar se autori ka ndërtuar teori të shumta për njerëz që “nuk i njeh dhe nuk i ka takuar kurrë”.
Sipas tyre, kushdo që kërkon fakte do t’i gjejë diku tjetër, ndërsa ata që kërkojnë “teori të çmendura konspirative dhe melodramë” e dinë ku t’i gjejnë.
Pjesë nga libri, të publikuara nga media britanike, përmendin edhe kritika ndaj Invictus Games Foundation dhe eventit sportiv Invictus Games. Sipas librit, ish-drejtuesi i fondacionit, Dominic Reid, ishte shqetësuar se gara sportive po kthehej në “shfaqjen e Harry dhe Meghan”, duke lënë në hije atletët.
Por fondacioni reagoi duke thënë se është zhgënjyese që këto komente po marrin vëmendje dhe theksoi se qëllimi i eventit është të mbështesë rehabilitimin e ushtarëve dhe veteranëve të plagosur.
“Përpjekjet për të vënë në dyshim legjitimitetin e garuesve ose për të minimizuar përvojat e tyre janë thellësisht mosrespektuese ndaj burrave dhe grave për të cilët u krijuan këto lojëra,” thuhet në reagimin e fondacionit.
