Britney Spears ka reaguar publikisht për herë të parë, tre javë pasi u arrestua nën dyshimet për drejtim mjeti në gjendje të dehur (DUI).
Përmes një postimi në Instagram, ajofalënderoi fansat për mbështetjen dhe theksoi rëndësinë e familjes në këtë periudhë:
“Faleminderit për gjithë mbështetjen… të kalosh kohë me familjen dhe miqtë është një bekim.”
Në një video të publikuar, Spears shfaqet në shtëpi pranë djalit të saj 19-vjeçar, Jayden, ndërsa të dy pozojnë para pasqyrës.
Sipas raportimeve të mediave ndërkombëtare, Spears ka qëndruar esëll që prej arrestimit më 3 mars në Kaliforni dhe nuk ka konsumuar alkool për më shumë se tre javë. Ajo gjithashtu po ndjek rregullisht takimet e Alcoholics Anonymous në zonën e Los Anxhelosit.
Burime pranë këngëtares bëjnë me dije se ajo është treguar e hapur gjatë këtyre takimeve dhe e përkushtuar ndaj procesit të rikuperimit, duke u fokusuar veçanërisht te mirëqenia dhe roli i saj si nënë.
Spears po kalon gjithashtu më shumë kohë me dy djemtë e saj, Sean Preston (20) dhe Jayden, të cilët i ka nga martesa me ish-bashkëshortin Kevin Federline. Sipas burimeve, afrimi me ta ka pasur një ndikim pozitiv në gjendjen emocionale të artistes.
Kjo nuk është hera e parë që Spears merr pjesë në programin e Alcoholics Anonymous. Në librin e saj autobiografik The Woman in Me, ajo ka treguar se gjatë periudhës së kujdestarisë ligjore 13-vjeçare ishte e detyruar të merrte pjesë në takime disa herë në javë.
Ndërkohë, përfaqësues të këngëtares kanë deklaruar se ajo është e vendosur të bashkëpunojë me autoritetet dhe të ndërmarrë hapa për përmirësimin e jetës së saj pas incidentit.
