Kryeministri Edi Rama mbajti sot një takim (1 prill) me anëtarë të strukturave dhe mbështetës të PS-së në Njësinë nr. 4 në Tiranë, ku foli për tematika të ndryshme nga aktualiteti politik dhe ekonomiko-social.
Ai preku edhe krizën e karburanteve, ku shpjegoi se lufta në Iran ka rritur çmimet në mënyrë të shpejtë dhe të lartë që nuk vareshin nga qeveria, por shtoi se tani është ngritur edhe kompania shtetërore bashkë me Emiratet e Bashkuara Arabe për markimin e të gjithë karburantit dhe gjurmimin e tij, me qëllim që të mos kontrabandohet më.
“Ne sot kemi problem naftën që është goditur në çmin nga kriza, por edhe një problem përtej nesh. Ajo që po ndodh në Ngushticën e Hormuzit e ka ngritur çmimin shumë gjithandej, më thanë edhe sia miq në Gjermani, tmerr. Ne do hyjmë në tregun e naftës me faktor shtetëror, m kompani publike, në atë kohë s’kishte lidhje me luftën, por pse tani? Sepse konsumatorët tanë nuk do paguajnë më shumë dhe rezervat, edhe kjo është koncidencë sepse ligji i ri për rezervën, është bërë më përpara. Kemi pasur edhe një naftë që dikur markohej, ngjyrosej me element kimik, që markohej, por ajo ishte një bojë që sajohej e prodhohej kollaj dhe ndikonte te kontrabanda. Tani kemi krijuar një kompani, që e ka edhe shteti në Emiratet e bashkuara Arabe, punë një apo dy muajsh sepse është në fazën finale, do nxjerrim një bojë dhe ngjyrues e pamanipulueshme”, tha kryeministri.
Kreu i mazhorancës tha se një pjesë e naftës është jashtë radarëve të shtetit dhe kontrabandohet duke shkaktuar dëm ekonomik, kurse distributorët fitojnë më shumë se çfarë duhet. Sipas tij, ky ligj dhe kompani e re do të rregullojë jo vetëm tregun, por edhe çmimin që të mos jetë abuziv.
“Ka një sasi nafte që është jashtë radarëve të shtetit. Por ka edhe një tjetër naftë që është ajo tranzit, që kalon territoret e tjera, por edhe brenda ku ka naftë ilegale. Shteti shqiptar ka shumicën e aksioneve, pjesën tjetër e kanë Emirateve. Dikur ndiqej nafta me makina, sot e ndjekim me anë të markimit. Kompania do arrijë qëllimin që të jetë furnizues në treg, të përcaktojë rregullat e lojës që të mos jetë çmim arbitrar, por i bazuar te bursa, e i jep distributorëve të fitojnë, por jo të stërfitojnë”, vijoi ai.
Kurse për procesin e integrimit, Rama u shpreh se Shqipëria e meritoi hapjen e shpejtë të negociatave nëpërmjet hapjes së të gjithë grupkapitujve me një kohë rekord, ndryshe nga vendet e tjera.
“Në krahasim me të gjitha vendet që kanë procesin e hapjes së negociatave për integrimin ne kemi rekordin e kohës së hapjes së të gjithë grupkapitujve. Është edhe lëvizja e BE-së për të na dhënë notën. Detyra jonë është të qeverisim dhe t’ju informojmë”, tha ai.
