Blake Lively kishte kërkuar zyrtarisht nga Producers Guild of America (PGA) që të njihej si producente për punën e saj në filmin It Ends With Us, shumë përpara se të përfshihej në një betejë të gjatë ligjore me regjisorin dhe bashkë-aktorin Justin Baldoni.
Në një email të gjatë të datës 25 janar 2024, të siguruar nga media britanike Daily Mail, Lively shprehej se puna e saj “pas kamerave” në këtë projekt kishte një rëndësi të jashtëzakonshme për të, duke e cilësuar si më të rëndësishmen në karrierën e saj 20-vjeçare.
“Vetëm pak ditë më parë, më është dhënë zyrtarisht titulli i Producentes, pas një viti e gjysmë përpjekjesh dhe pune të palodhur për ta merituar atë,” shkruante ajo.
Aktorja theksonte se kishte qenë e përfshirë në çdo fazë të filmit: nga paraprodhimi, xhirimet, postproduksioni, deri te marketingu dhe publikimi global.
Lively gjithashtu shprehej mirënjohëse që kontrata e saj ishte rishikuar për të reflektuar kontributin e saj dhe i kërkonte PGA-së “nderin e madh” për të marrë një “PGA tag” – një njohje prestigjioze në industrinë e filmit.
Në email, ajo kishte përfshirë një listë me 77 pika ku argumentonte rolin e saj si producente. Mes tyre, pretendonte se kishte rishkruar skenarin për të përmirësuar personazhin kryesor, kishte përdorur kontakte në industrinë e modës për të ulur kostot dhe kishte ndihmuar në përzgjedhjen e stafit.
Letra e saj u rikthye në vëmendje gjatë procesit gjyqësor ndaj Baldonit. Gjyqtari Lewis Liman citoi këtë email në vendimin për të rrëzuar shumicën e akuzave të ngritura nga Lively.
Sipas gjykatës, fakti që ajo kishte ushtruar kontroll të konsiderueshëm mbi projektin tregonte se nuk ishte një punonjëse, por një kontraktore e pavarur — çka e pengon të vazhdojë disa nga pretendimet për ngacmim seksual.
Megjithatë, disa akuza, përfshirë ato për hakmarrje dhe shkelje kontrate, do të vazhdojnë në gjykim. Seanca gjyqësore është caktuar për 18 maj.
Blake Lively paditi Baldonin në dhjetor 2024, duke kërkuar të paktën 161 milionë dollarë dëmshpërblim, duke e akuzuar për një fushatë shpifjeje gjatë promovimit të filmit.
Nga ana tjetër, Justin Baldoni i ka mohuar kategorikisht akuzat dhe kishte ngritur një kundërpadi prej 400 milionë dollarësh ndaj Lively dhe bashkëshortit të saj, Ryan Reynolds — e cila më pas u rrëzua nga gjykata.
