Në mesazhin tradicional të Pashkëve “Urbi et Orbi”, Papa Papa Leo XIV u ndal gjerësisht te përgjegjësia e çdo të krishteri për të mos pranuar dhunën dhe pasojat e luftërave.
“Brenda dritës së Pashkëve, le të lejojmë Krishtin të na ndryshojë zemrën me dashurinë e tij të pakufishme. Kush mban armë, le t’i dorëzojë ato. Kush ka pushtetin të shkaktojë luftëra, le të zgjedhë paqen, jo një paqe të bazuar te forca, por përmes dialogut,” theksoi Papa.
Ai paralajmëroi për atë që e quajti një “globalizim të indiferencës”, duke theksuar se shoqëritë po mësohen me dhunën dhe po bëhen të pandjeshme ndaj vuajtjeve njerëzore dhe pasojave të konflikteve.
Në këtë kontekst, ai kujtoi edhe mesazhet e paraardhësit të tij, Papa Françesku, i cili kishte ngritur shqetësime të ngjashme për përhapjen e urrejtjes dhe luftërave në botë.
Duke iu drejtuar besimtarëve të mbledhur në Sheshin e Shën Pjetrit dhe katolikëve në mbarë botën, Papa theksoi se paqja e vërtetë nuk kufizohet vetëm në mungesën e luftimeve, por është ajo që transformon zemrat e njerëzve. Ai bëri thirrje për pendim dhe angazhim aktiv për paqen, duke ftuar besimtarët të marrin pjesë në një vigjilje lutjeje për paqen më 11 prill në Sheshin e Shën Pjetrit.
Në përfundim të mesazhit të tij, Papa Leo XIV apeloi për braktisjen e çdo forme konflikti, dominimi apo përçarjeje, duke lutur për paqe në një botë të goditur nga luftërat dhe e shënjuar nga urrejtja dhe indiferenca.
