Lisa Kudrow ka bërë një deklaratë të sinqertë për rolin e saj ikonë në serialin Friends, duke pranuar se nuk ishte personazhi më i pëlqyer nga publiku.
Në një intervistë të fundit për The Independent, ajo u shpreh hapur: “Askush nuk interesohej për mua”, duke shtuar se në disa raste në agjencinë e saj të talenteve e quanin “shoqja e gjashtë”.
Kudrow, e cila luajti rolin e Phoebe Buffay përkrah Jennifer Aniston, Courteney Cox, David Schwimmer, Matt LeBlanc dhe të ndjerit Matthew Perry, fitoi çmimin Emmy në vitin 1998 për aktoren më të mirë dytësore në një serial komik. Megjithatë, ajo thotë se shumëkush nuk besonte se do të kishte një karrierë të gjatë në Hollywood.
“Nuk kishte ndonjë vizion për mua apo pritshmëri për të ardhmen time profesionale. Thjesht mendohej se isha me fat që isha pjesë e atij seriali,” u shpreh ajo.
Seriali “Friends”, i transmetuar nga viti 1994 deri në 2004, mbetet një nga sitcom-et më të suksesshme në histori.
Kudrow gjithashtu foli për sfidat që hasi në interpretimin e Phoebe, duke theksuar se në fillim personazhi ishte shumë larg personalitetit të saj real.
“U desh shumë punë për të justifikuar mënyrën se si ajo fliste dhe vepronte. Ishte sfiduese, por edhe argëtuese,” tha ajo, duke shtuar se me kalimin e viteve disa elemente të Phoebe-s u bënë pjesë e saj.
Aktorja kundërshtoi gjithashtu perceptimin se Phoebe ishte “budallaqe”, duke theksuar se ajo e shihte personazhin si të veçantë dhe jo të paditur.
Së fundmi, 62-vjeçarja foli edhe për plakjen dhe karrierën e saj, duke treguar se kishte provuar Botox vetëm pas moshës 60-vjeçare, por tani mendon ta lërë pas.
“Kam frikë të shoh veten një ditë si gjyshja ime, por jam e emocionuar të interpretoj role më të pjekura,” përfundoi ajo.
