Kanye West, i njohur gjithashtu si Ye, është ndaluar të hyjë në Mbretërinë e Bashkuar, duke çuar në anulimin e festivalit muzikor Wireless Festival, ku ai pritej të ishte kryesues.
Organizatorët e Festival Republic, pjesë e kompanisë Live Nation, njoftuan se autoritetet britanike i kanë tërhequr reperit autorizimin elektronik të udhëtimit (ETA), duke i ndaluar hyrjen në vend.
“Si rezultat, Wireless Festival anulohet dhe të gjithë mbajtësit e biletave do të rimbursohen,” thuhet në deklaratë.
Vendimi vjen pas reagimeve të forta ndaj deklaratave dhe publikimeve të Kanye West në rrjetet sociale, të cilat janë cilësuar si antisemitike. Presioni ndaj qeverisë britanike ishte rritur ndjeshëm, ndërsa disa sponsorë të mëdhenj, përfshirë Pepsi, u distancuan nga eventi.
Organizatorët theksuan se antisemitizmi “është i papranueshëm në çdo formë” dhe pranuan ndikimin që kjo situatë ka pasur.
Vetë Kanye West reagoi duke thënë se dëshironte të vinte në Londër për të “sjellë unitet, paqe dhe dashuri përmes muzikës”. Ai gjithashtu shprehu gatishmërinë për t’u takuar me përfaqësues të komunitetit hebre në Mbretërinë e Bashkuar.
“E di që fjalët nuk mjaftojnë — duhet ta tregoj ndryshimin me veprime,” u shpreh ai.
Organizata Board of Deputies of British Jews deklaroi se komuniteti hebre pret “pendesë të sinqertë dhe ndryshim real” përpara se të besojë në qëllimet e artistit. Ndërkohë, ministri britanik i Shëndetësisë Wes Streeting kritikoi ashpër përzgjedhjen e reperit si kryesues të festivalit, duke e cilësuar si “një gabim të rëndë”.
Edhe kryeministri Keir Starmer kishte shprehur më herët kundërshtimin e tij ndaj pjesëmarrjes së West në këtë event.
