Egnatia dhe Elbasani kanë shtyrë çdo verdikt për në sfidën e kthimit, pasi dueli i parë gjysmëfinal i Kupës së Shqipërisë në Arena Egnatia u mbyll në barazim 1-1. Sota iluzionoi rrogozhinasit me avantazhin, por Ze Gomes ktheu ekuilibrat me një gol të kontestuar, që u deshën 7 minuta në VAR për ta vlerësuar.
Ishte një ndeshje që nisi me ritëm të lartë dhe me shumë intensitet, sidomos në pjesën e parë, ku të dy skuadrat kërkuan të merrnin kontrollin e lojës dhe të krijonin avantazh përpara aktit të dytë të këtij dueli. Egnatia arriti të godiste e para me anë të mbrojtësit Eljon Sota, i cili shfrytëzoi momentin më të mirë të rrogozhinasve për të kaluar vendasit në avantazh. Goli i dha më shumë qetësi skuadrës së Egnatias, e cila për disa minuta u duk më e organizuar dhe më e rrezikshme në manovrën sulmuese.
[video width="704" height="360" mp4="https://cdnimpuls.com/lapsi.al/wp-content/uploads/2026/04/69d67e76df0a3.mp4"][/video]
Lexo më tej: Dy kartonë të kuq, por asnjë gol: Elbasani dhe Egnatia ndajnë pikët
Megjithatë, përgjigjja e Elbasani erdhi para pushimit. Në minutën e 44-t, Ze Gomes dërgoi topin në rrjetë dhe riktheu baraspeshën në takim, por festa e verdhebluve u pezullua për disa minuta për shkak të kontrollit të VAR-it. Episodi u kthye në momentin më të diskutuar të ndeshjes. Gjyqtari Grimci u sinjalizua për një pozicion të mundshëm jashtë loje, ndërsa arbitrat e VAR-it, Albert Doda dhe Dorjan Maletaj, morën rreth shtatë minuta për të përcaktuar vijat dhe për të konfirmuar se sulmuesi ishte në pozicion të rregullt. Vetëm atëherë goli u quajt i vlefshëm dhe rezultati u fiksua në 1-1.
[video width="694" height="360" mp4="https://cdnimpuls.com/lapsi.al/wp-content/uploads/2026/04/69d686e9b1b6c.mp4"][/video]
Në pjesën e dytë ritmi ra ndjeshëm. Të dy skuadrat treguan më shumë kujdes në fazën mbrojtëse, duke shmangur rreziqet e panevojshme dhe duke mos i dhënë shumë hapësira kundërshtarit. Asnjëra nuk ishte e gatshme të rrezikonte shumë, me vetëdijen se gjithçka do të vendoset në 90 minutat e kthimit. Pas këtij barazimi, asgjë nuk është zgjidhur. Gjysmëfinalja mbetet plotësisht e hapur dhe bileta për në finale do të përcaktohet më 23 prill, në një sfidë ku tensioni dhe pesha e rezultatit pritet të jenë edhe më të mëdha.
