Aktorja Aubrey Plaza ka konfirmuar se është në pritje të fëmijës së saj të parë, duke ndarë lajmin e bukur gjatë një episodi të podcast-it Smartless me Jason Bateman, Sean Hayes dhe Will Arnett.
“Ka një bebe brenda meje,” u shpreh ajo, duke i lënë të habitur moderatorët, të cilët reaguan me entuziazëm ndaj lajmit.
Aktorja 41-vjeçare tregoi se kishte bërë një vizitë te mjeku për një eko, duke zbuluar se gjithçka po shkon mirë. Ajo madje ndau me humor se edhe qeni i saj kishte bërë një kontroll të ngjashëm në të njëjtën ditë.
Kur u pyet nëse ndihet e emocionuar për rolin e ri si nënë, Plaza u përgjigj pozitivisht: “Po, gjithmonë kam dashur të shoh si është kjo eksperiencë. Më duket shumë interesante.”
Sipas raportimeve, ajo pret fëmijën e parë me partnerin e saj, Christopher Abbott. Lajmi vjen më shumë se një vit pas një periudhe të vështirë për aktoren, pas humbjes së bashkëshortit të saj, Jeff Baena, në vitin 2025.
Burime pranë çiftit janë shprehur se shtatzënia ishte një “surprizë e bukur pas një viti emocional” dhe se ata ndihen shumë të bekuar.
Plaza dhe Abbott kanë bashkëpunuar më parë në projekte si Black Bear dhe në shfaqjen teatrale “Danny and the Deep Blue Sea”. Ndërkohë, aktorja së fundmi është parë në publik me barkun e rrumbullakosur gjatë një shëtitjeje në Nju Jork.
