Aktorja dhe modelja Ruby Rose ka akuzuar publikisht këngëtaren Katy Perry për një incident të dyshuar sulmi seksual që, sipas saj, ka ndodhur rreth 20 vite më parë në një klub nate në Melburn.
Rose i bëri deklaratat përmes rrjeteve sociale, ku pretendoi se ngjarja ka ndodhur kur ajo ishte në fillim të të 20-ave dhe se i janë dashur pothuajse dy dekada për të folur publikisht.
Ajo shtoi se trauma dhe përjetimet e tilla e kanë bërë të vështirë të flasë më herët, duke theksuar ndikimin e thellë që kanë rastet e abuzimit seksual.
Nga ana tjetër, një përfaqësues i Katy Perry i ka mohuar kategorikisht akuzat, duke i cilësuar ato si “plotësisht të pavërteta, të rrezikshme dhe të papërgjegjshme”. Në deklaratë thuhet gjithashtu se Rose ka bërë edhe më parë akuza të rënda publike ndaj personave të ndryshëm, të cilat janë mohuar nga palët e përfshira.
Rose deklaroi se nuk është e interesuar të ndjekë rrugë ligjore për këtë çështje, por pretendon se ka prova dhe dëshmitarë për atë që ka ndodhur. Rasti ka shkaktuar reagime të shumta në rrjet, ndërsa deri tani nuk ka pasur zhvillime të mëtejshme ligjore lidhur me këto akuza.
