Aktori Ethan Jamieson, i njohur për rolin e tij në filmin e vitit 2012 “The Hunger Games”, është arrestuar pasi dyshohet se ka sulmuar tre persona me armë zjarri.
Sipas raportimit të TMZ, 27-vjeçari u ndalua nga policia në Raleigh, Karolina e Veriut, pasi dyshohet se ka përdorur një pistoletë gjysmë-automatike 9 mm gjatë incidentit. Emrat e viktimave nuk janë bërë publikë dhe në dokumente identifikohen vetëm me inicialet E.F., J.M. dhe K.W.
Sipas raportit të arrestimit, kjo nuk është hera e parë që Jamieson përballet me ligjin. Në mars të vitit 2025, ai ishte arrestuar për “rezistencë ndaj një zyrtari publik” në të njëjtin qytet, ndërsa më 26 mars ishte dënuar për këtë vepër.
Jamieson e nisi karrierën e tij në ekran me një rol episodik në serialin “One Tree Hill” në vitin 2009. Më pas ai u shfaq në filmin “The Rusty Bucket Kids: Lincoln, Journey to 16” (2010), ndërsa roli i tij i fundit ishte në një episod të serialit “Justified” në vitin 2013.
Në një intervistë të mëhershme, aktori kishte folur për përvojën e tij në “The Hunger Games”, ku luanin edhe emra të njohur si Jennifer Lawrence, Liam Hemsworth dhe Josh Hutcherson.
Ai kishte treguar se në sheshxhirim mbizotëronte një atmosferë argëtuese dhe aktorët shpesh bënin shaka me njëri-tjetrin.
Megjithatë, Jamieson kishte pranuar se nuk synonte një karrierë afatgjatë në aktrim, duke theksuar se dëshironte të jetonte një jetë “normale” jashtë vëmendjes së publikut.
Hetimet për ngjarjen janë në vijim.
