Krijuesi dhe regjisori i serialit Euphoria, Sam Levinson, ka reaguar ndaj kritikave të forta për sezonin e tretë, duke mbrojtur skenat e diskutueshme të personazhit Cassie, të interpretuar nga Sydney Sweeney.
Sezoni i ri, i cili u publikua më 13 prill, ka nxitur debat të madh për shkak të një linje narrative ku Cassie hap një llogari në platformën OnlyFans dhe publikon përmbajtje eksplicite. Në disa skena, aktorja shfaqet e veshur me kostume provokuese, gjë që ka shkaktuar reagime të ashpra nga publiku dhe kritika ndaj saj për pranimin e këtyre roleve.
Në një intervistë për The Hollywood Reporter, Levinson theksoi se skenat kanë edhe elemente humori dhe absurdi. Ai përmendi se një nga detajet që i jep një dimension tjetër skenave është fakti që personazhi i Cassie-s filmohet nga shërbyesja e saj.
“Qëllimi ynë ishte të gjenim një shtresë tjetër absurditeti, në mënyrë që të mos mbetemi vetëm te fantazia apo iluzioni i personazhit,” u shpreh ai.
Regjisori shtoi se, së bashku me drejtorin e fotografisë Marcell Rév, kanë menduar me kujdes estetikën vizuale të skenave. Ai pranoi se përshtatja e stilit të OnlyFans me estetikën e serialit ishte një sfidë.
“Disa nga këto skena i kemi ndriçuar vetëm me dritat që përdor vetë personazhi. Brenda duket bukur dhe e ndritshme, por jashtë gjithçka bëhet e errët. Është diçka e pakëndshme dhe tronditëse,” tha Levinson.
Sipas tij, synimi ishte të tregohej jo vetëm ajo që personazhi përpiqet të projektojë në publik, por edhe ana më e errët dhe depresive e realitetit.
“Duam të tregojmë kontrastin – çfarë ajo shfaq dhe çfarë fshihet pas kësaj. Motoja jonë është: evoluo ose vdis,” përfundoi ai.
