Një delegacion i lartë nga Shtetet e Bashkuara ka mbërritur në Islamabad për të rinisur negociatat me Iran, në përpjekje për uljen e tensioneve mes dy vendeve.
Delegacioni udhëhiqet nga zëvendëspresidenti amerikan JD Vance dhe përfshin gjithashtu Jared Kushner, dhëndrin e presidentit Donald Trump, si dhe negociatorin special Steve Witkoff.
Sipas agjencisë AFP, autoritetet pakistaneze kanë shtuar ndjeshëm masat e sigurisë në kryeqytet përpara rifillimit të bisedimeve, të cilat synojnë të gjejnë një zgjidhje për konfliktin mes Uashingtonit dhe Teheranit.
Donald Trump deklaroi në platformën Truth Social se përfaqësuesit amerikanë do të jenë në Islamabad të hënën në mbrëmje për të zhvilluar bisedime që mund të çojnë drejt përfundimit të krizës.
Autoritetet lokale kanë vendosur kufizime të lëvizjes në disa zona të Islamabadit dhe në qytetin fqinj Rawalpindi, përfshirë bllokime rrugësh dhe kontrolle të shtuara pranë hoteleve kryesore si Marriott dhe Serena, ku janë zhvilluar edhe raunde të mëparshme negociatash.
Pamjet nga terreni tregojnë prani të shtuar të forcave të sigurisë, tela me gjemba dhe pika kontrolli, ndërsa qytetarëve u është bërë thirrje të bashkëpunojnë për të shmangur tensionet gjatë zhvillimeve diplomatike.
