Christina Applegate ka reaguar për herë të parë pas shtrimit të saj të fundit në spital, duke dhënë një mesazh shprese për fansat.
Përmes një postimi në Instagram, 54-vjeçarja falënderoi ndjekësit për mbështetjen dhe mesazhet e shumta.
“Faleminderit për gjithë dashurinë dhe urimet. Problemet shëndetësore janë një realitet i vazhdueshëm për mua, por jam e fortë dhe po bëhem më e fortë dhe më mirë çdo ditë,” shkroi ajo.
Aktorja shtoi se po merr kohë për t’u përqendruar te shëndeti i saj, por premtoi se do të rikthehet së shpejti me më shumë për të ndarë. Christina Applegate u diagnostikua me multiple sclerosis në vitin 2021 dhe që atëherë ka qenë shumë e hapur për sfidat që përjeton.
Ajo u shtrua në spital në Los Anxhelos në fund të muajit të kaluar, megjithëse nuk është konfirmuar nëse kjo lidhej drejtpërdrejt me sëmundjen e saj autoimune. Burime pranë aktores kanë treguar se ajo përballet me ditë të mira dhe shumë të vështira, ndërsa beteja me sëmundjen mbetet sfiduese.
Në librin e saj të ri, “You With the Sad Eyes”, aktorja ka ndarë detaje të sinqerta mbi përvojën e saj, përfshirë humbjen e konsiderueshme në peshë dhe vështirësitë fizike.
Ajo ka theksuar vazhdimisht rëndësinë e sinqeritetit përballë publikut, duke treguar realitetin e jetës me një sëmundje kronike.
“Jeta ime nuk është perfekte. Ndonjëherë është vërtet e vështirë,” është shprehur aktorja në një intervistë të mëparshme.
