Ministri i Punëve të Brendshme, Besfort Lamallari, ka dhënë një mesazh të qartë për të gjithë drejtuesit e automjeteve që shkelin rregullat e qarkullimit rrugor.
Përmes një reagimi mbi forcimin e masave për sigurinë rrugore, Lamallari thekson se edhe në rastet kur nuk ka prezencë fizike të policisë në rrugë, monitorimi vijon pa ndërprerje falë teknologjisë së avancuar.
“Mund të mos shihni policë në rrugë, por teknologjia është aty me dronë e mjete inteligjente që ndjekin çdo shkelje, në çdo aks, në çdo moment,” shprehet ai.
Sipas ministrit, “syri i pagabueshëm” i teknologjisë ka bërë të mundur evidentimin në kohë reale të çdo shkeljeje, duke përfshirë tejkalimin e shpejtësisë, drejtimin e mjetit nën efektin e alkoolit, përdorimin e celularit gjatë drejtimit, si dhe parkimet e gabuara.
Kjo qasje e re synon jo vetëm ndëshkimin, por mbi të gjitha parandalimin e aksidenteve dhe rritjen e përgjegjshmërisë tek drejtuesit e mjeteve.
“Mund të mos shihni policë në rrugë, por teknologjia është aty me dronë e mjete inteligjente që ndjekin çdo shkelje, në çdo aks, në çdo moment. Syrit të pagabueshëm të teknologjisë nuk i shpëton dot askush që shkel pedalin e gazit përtej normave, ata që janë në timon nën efektin e alkolit, të tjerë që përdorin edhe celularin apo ata që parkojnë vend e pavend”, shkruan ministri Lamallari teksa publikon pamjet nga monitorimi që policia i bën rrugëve të vendit përmes teknologjisë.
