Më pak se dy muaj para nisjes së Kupa e Botës FIFA 2026, shqetësimet për sigurinë në Meksikë po rriten ndjeshëm, veçanërisht në qytetet pritëse.
Në Guadalajara, një nga qytetet ku do të zhvillohen ndeshje, situata është përkeqësuar ndjeshëm. Sipas të dhënave zyrtare, 90.2% e banorëve thonë se ndihen të pasigurt, një rritje e fortë krahasuar me fundin e vitit 2025.
Situata u tensionua pas operacionit të forcave federale kundër Nemesio Oseguera Cervantes, i njohur si “El Mencho”, lider i CJNG. Ai u plagos gjatë operacionit dhe më pas humbi jetën, duke shkaktuar një valë dhune në rajonin e Jalisco, përfshirë edhe qytete si Zapopan dhe Puerto Vallarta.
Në Zapopan, ku ndodhet stadiumi pritës i Botërorit, rreth 70% e banorëve deklarojnë se ndihen të pasigurt, një rritje e ndjeshme krahasuar me muajt e mëparshëm.
Edhe në Puerto Vallarta, një nga destinacionet më të njohura turistike, pasiguria është rritur ndjeshëm. Përqindja e banorëve që ndihen të pasigurt është rritur nga 32% në pothuajse 60% në vetëm pak muaj.
Ndërkohë, në rang kombëtar, qyteti i Irapuato mbetet më problematiku, me mbi 92% të banorëve që ndihen të pasigurt.
Në Mexico City, perceptimi i pasigurisë mbetet relativisht i qëndrueshëm, me rreth 44% në zonën e Coyoacán dhe rreth 58% në Tlalpan. Ndërsa në Monterrey është vënë re një përmirësim, ku përqindja e banorëve që ndihen të pasigurt ka rënë në rreth 59.7%.
Siguria mbetet një nga sfidat kryesore për organizatorët e Botërorit, që këtë herë zhvillohet në tre vende: Meksikë, SHBA dhe Kanada.
Autoritetet përballen me presion në rritje për të garantuar sigurinë e tifozëve dhe banorëve, ndërsa frika nga dhuna e organizuar vijon të mbetet e lartë në disa nga zonat kyçe të turneut.
