Kryetarja e Kuvendit të Kosovës, Albulena Haxhiu ka njoftuar se sonte do të mbahet një seancë e jashtëzakonshme për zgjedhjen e presidentit, e cila do të mbahen në ora 20:30.
Në kuadër të kësaj kërkese janë propozuar dy kandidatura për President: Feride Rushiti dhe Hatixhe Hoxha.
Feride Rushiti është mjeke dhe aktiviste për të drejtat e njeriut nga Kosova, e njohur për punën e saj në rehabilitimin e të mbijetuarve të dhunës seksuale gjatë luftës dhe mbështetjen e grupeve të cenueshme. Ajo është themeluese dhe drejtoreshë ekzekutive e Qendrës Kosovare për Rehabilitimin e të Mbijetuarve të Torturës (QKRMT), një organizatë që ofron shërbime mjekësore, psikologjike dhe ligjore për të mbijetuarit e traumës.
Ndërsa Hatixhe Hoxha është pjesë e Lëvizjes Vetëvendosje që nga viti 2010, derisa ka mbajtur disa funksione partiake. Ajo ka qenë anëtare e Kryesisë së Lëvizjes Vetëvendosje dhe anetare e Kuvendit Komunal të Prishtinës. Gjithashtu, ka qenë edhe kandidate për deputete nga ky subjekt politik, duke fituar në dy mandate.
"Sot kam pranuar kërkesën e Grupit Parlamentar të Lëvizjes VETËVENDOSJE! për thirrjen e një seance të jashtëzakonshme për zgjedhjen e Presidentit, e cila do të mbahet sot në orën 20:30. Në kuadër të kësaj kërkese janë propozuar dy kandidatura për President: Feride Rushiti dhe Hatixhe Hoxha. I ftoj që të gjithë deputetët e Kuvendit të Republikës së Kosovës që të marrin pjesë në këtë seancë, në përputhje me obligimet e tyre kushtetuese" - shkroi Haxhiu në rrjetet sociale.
Më herët u tërhoq nga kandidatura e tij, Zëvendëskryeministri, Glauk Konjufca. Njoftimin e bëri në një deklaratë në sallën e kuvendit.
“Zonja kryetare unë në fjalim tim thash se tërhiqem si kandidat për president, mund të jetë marrë ndoshta kështu në formë më politike, pro nëse doni me marrë në formën juridiko-kushtetuese apo në përputhje me rregulloren e Kuvendit unë formalisht për hir të transkriptit të regjistrohet kjo në mënyrë formale tërhiqem nga kandidatura për president të Republikës së Kosovës”, ka thënë Konjufca.
Pas tij fjalën e mori deputetja e Lëvizjes Vetëvendosje, Fatmire Mulhaxha-Kollçaku e cila po ashtu deklaroi se e tërheq kandidaturën e saj. “Edhe unë tërhiqem”, u shpreh ajo. /LAPSI.al
