Madonna ka qenë viktimë e një vjedhjeje gjatë pjesëmarrjes së saj në koncertin e Sabrina Carpenter në Coachella 2026, duke humbur disa veshje të rralla nga arkivi i saj personal.
Artistja ka rrëfyer se incidenti e ka prekur shumë, pasi bëhet fjalë për veshje “vintage” me vlerë të madhe emocionale dhe historike për të. Madonna ishte rikthyer në Coachella pas 20 vitesh, duke kujtuar performancën e saj në vitin 2006 me projektin Confessions on a Dance Floor.
“Është shumë emocionuese të rikthehem. Ndihet si një rreth që mbyllet,” u shpreh ajo, duke shtuar se kishte zgjedhur të vishte të njëjtat rroba si në performancën e atëhershme: çizmet, korseja dhe një xhaketë Gucci.
Megjithatë, pas performancës, këngëtarja zbuloi se këto veshje kishin humbur. “Ky moment u bë edhe më i veçantë, derisa kuptova se rrobat vintage që kisha veshur ishin zhdukur,” deklaroi ajo.
Sipas saj, nuk bëhet fjalë vetëm për disa rroba, por për pjesë të historisë së saj artistike. Madonna shtoi se edhe sende të tjera nga e njëjta periudhë mungojnë.
Në vend që të bëjë menjëherë kallëzim penal, ajo ka zgjedhur të publikojë informacione dhe foto të veshjeve të humbura, duke ofruar edhe shpërblim për këdo që i gjen dhe i rikthen ato.
