Prokuroria e Tiranës përfundoi hetimet dhe çoi në gjyq për libanezin Fadi Alwan për vrasjen e vajzës së tij, 24 vjeçares Rayyan Alwan. Sipas prokurorisë, ai do të gjykohet për akuzën e “Vrasjes në rrethana cilësuese”, vepër e cila parashikon dënim me burgim të përjetshëm. Trupi i pajetë i Rayyan Alwan, e cila u vra brenda një banese me qira në Tiranë, është tërhequr pak ditë më parë nga Instituti i Mjekësisë Ligjore.
Fadi Alwan mbërriti me të bijën nga Gjermania në Tiranë më 19 shkurt, nuk i tregoi askujt identitetin, e vrau me thikë në dhomën me qira në katin e tretë të një godine në rrugën “Gjon Muzaka” dhe iku me avion drejt Athinës, i qetë, ende pa u gjetur trupi i pajetë i së bijës, të cilën e zbuloi më 27 shkurt pronarja e banesës.
Ai mori gjithçka me vete, pasaportën e vajzës, celularin e saj me shpresën se nuk do të zbulohej. Nga Athina, në planin e tij të mirëorganizuar, 49-vjeçari udhëtoi drejt Amsterdamit, e më tej drejt Libanit. Lokalizimi i fundit është bërë atje dhe në bashkëpunim me Interpol, po punohet për arrestimin.
