Qytetarët e Shqipërisë dhe Kosovës do të mund të lëvizin pa kontrolle kufitare nga 1 maji deri më 30 shtator, në zbatim të marrëveshjes së arritur mes dy qeverive në pranverën e vitit 2024, e cila ka hyrë sërish në fuqi këtë të premte.
Lehtësimi parashikon kalimin e kufirit pa pasaportë apo kartë identiteti gjatë sezonit veror, ndërsa e njëjta skemë zbatohet edhe në periudhën 1 nëntor – 28 shkurt. Në total, qytetarët përfitojnë lëvizje të lirë për nëntë muaj të vitit, të ndarë në dy sezone.
Hyrja në fuqi e marrëveshjes është reflektuar në terren, ku në pikën kufitare të Morinit është shënuar fluks i lartë lëvizjesh. Pjesa më e madhe e udhëtarëve janë qytetarë nga Kosova, të cilët i janë drejtuar qyteteve shqiptare për fundjavë.
