Aktorja e njohur Meryl Streep ka ndarë mendimin e saj të sinqertë për industrinë e filmit, gjatë promovimit të filmit të ri The Devil Wears Prada 2.
Fituesja e trefishtë e çmimit Oscar u shpreh se filmat e sotëm shpesh janë bërë shumë të thjeshtë dhe të parashikueshëm.
“Mendoj se filmat sot janë bërë si Marvel – kemi të këqijtë dhe të mirët, dhe kjo është shumë e mërzitshme,” tha ajo gjatë një interviste.
Streep shtoi se ajo preferon histori më komplekse dhe më reale, ku personazhet nuk ndahen qartë në “të mirë” dhe “të këqij”.
“Ajo që është interesante në jetë është se disa heronj kanë të meta, ndërsa disa ‘armiq’ janë njerëzorë dhe interesantë,” u shpreh aktorja. “Kjo është ajo që më pëlqen te ky film – është më i çrregullt dhe më realist.”
Në vazhdimin e filmit të njohur, Streep rikthehet në rolin ikonik të Miranda Priestly, duke sjellë një anë të re të personazhit. Filmi bashkon sërish kastin kryesor, përfshirë Anne Hathaway dhe Emily Blunt, ndërsa historia ndjek zhvillimet e reja në botën e modës dhe medias.
Streep u shpreh gjithashtu se rikthimi te personazhi i Miranda Priestly pas kaq vitesh ka qenë një eksperiencë e lehtë dhe e këndshme.
“Duket sikur i ruan këta personazhe brenda vetes. Më pëlqeu ta zbuloja sërish,” tha ajo.
