Premier League dominon futbollin europian dhe për herë të parë në histori dërgon një skuadër në çdo finale europiane. Një rezultat që u garanton klubeve angleze mundësinë për të pasur pesë ekipe pjesëmarrëse në fazën “League Phase” të Champions League, por skuadrat angleze në kompeticionin më të rëndësishëm europian mund të bëhen madje 6.
Nëse Aston Villa – që do të luajë tri javët e fundit të kampionatit kundër Burnley, Liverpool dhe Manchester City – arrin të mbyllë sezonin mes pesë vendeve të para dhe njëkohësisht fiton Europa League, atëherë edhe vendi i gjashtë në Premier League do të siguronte kualifikimin në Champions.
Por nuk mbaron këtu, sepse ekziston edhe një tjetër skenar që mund ta çojë numrin e skuadrave angleze në kupat europiane deri në 10. Nëse Aston Villa fiton finalen e Europa League dhe e mbyll kampionatin jashtë gjashtë vendeve të para, Crystal Palace triumfon në Conference League (duke siguruar kështu një vend në Europa League sezonin e ardhshëm) dhe Chelsea fiton FA Cup më 16 maj pa u renditur mes gjashtë më të mirave në Premier League, atëherë Anglia do të kishte 10 skuadra në Europë: 6 në Champions League (5 të parat e kampionatit plus fituesja e Europa League), 3 në Europa League (vendi i gjashtë në kampionat plus fituesja e FA Cup dhe Conference League) dhe 1 në Conference League (skuadra e vendit të shtatë në Premier League).
