Taylor Swift është përfshirë në një betejë ligjore pasi një ish-showgirl nga Las Vegasi e ka paditur për shkelje të markës tregtare lidhur me albumin e saj më të ri, “The Life of a Showgirl”.
Sipas dokumenteve gjyqësore, Maren Flagg — e njohur në skenë si Maren Wade — pretendon se Swift ka përdorur një emër shumë të ngjashëm me markën e saj të regjistruar “Confessions of a Showgirl”. Flagg kërkon që këngëtarja të ndalohet menjëherë nga shitja e produkteve promocionale që lidhen me albumin, ndërsa çështja vazhdon në gjykatë.
Nga ana tjetër, avokatët e Taylor Swift kanë reaguar ashpër ndaj padisë, duke e cilësuar atë si të pabazë dhe oportuniste.
“Kjo padi nuk duhej të ishte ngritur kurrë. Është thjesht një tjetër përpjekje për të përdorur emrin dhe famën e Taylor Swift për të promovuar markën personale të paditëses,” thuhet në dokumentin e paraqitur nga ekipi ligjor i artistes.
Ata argumentojnë gjithashtu se nuk ka asnjë mundësi që publiku të ngatërrojë albumin e Swift me shfaqjet e Flagg, të cilat sipas tyre zhvillohen kryesisht në ambiente të vogla dhe për publik të kufizuar.
Avokatët e Swift pretendojnë se Maren Flagg filloi të përdorte shpesh frazën “The Life of a Showgirl” në rrjetet sociale vetëm pasi artistja njoftoi albumin e saj të ri.
“Para publikimit të albumit, paditësja nuk e kishte përdorur këtë frazë në promovimet e saj. Pas njoftimit të Taylor Swift, ajo publikoi dhjetëra postime lidhur me albumin dhe emrin e artistes,” thuhet më tej në reagimin ligjor.
Megjithatë, avokati i Flagg deklaroi për mediat amerikane se ata do ta vazhdojnë procesin gjyqësor.
“Klientja ime e regjistroi këtë markë dhe e ndërtoi vetë. Ne respektojmë suksesin e Taylor Swift, por ligji për markat tregtare ekziston për të mbrojtur krijuesit në çdo nivel,” u shpreh ai.
