Java e 35 e La Liga dorëzon edhe titullin: e fiton, si pritej, Barcelona që mposht 2-0 Real Madrid në El Clasico dhe rrëmben titullin kampion në La Liga për herë të 29-të. I shkatërruar nga humbja e të atit, Hansi Flick sheh super-ndeshjen të zgjidhet për 20 minuta: Rashford e zhbllokon pas tetë minutash me një magji nga goditja e dënimit, Ferran Torres mbyll historinë në minutën e 18'. Me një Vinicius në presion e një Courtois të jashtëzakonshëm, Real mund vetëm të limitojë dëmet.
Barcelona feston titullin e 29-të në La Liga, dy nga dy me Hansi Flick, të tretin në 4 vite, ndërsa Madridi dëshpërohet duke u zhytur edhe më thellë në spiralen e tij vetëshkatërruese të kaosit, anarkisë dhe depresionit. Vetëm një herë, më 3 prill 1932, një La Liga ishte vendosur nga një El Clásico: Madridi kampion duke barazuar në Barcelonë. Me rezultatin 2-0, katalanasit, me 3 javë nga fundi, shkojnë në +14 ndaj rivalëve (që me Xabi Alonson kishin 5 pikë avantazh pas El Clásico në tetor) dhe vazhdojnë të vrapojnë drejt 100 pikëve të arritura në vitin 2012 nga Reali i Mourinhos dhe në 2013 nga Barça e të ndjerit Vilanova. Barça ka fituar 18 ndeshje nga 18 në shtëpi.
Heronjtë blaugrana
Është La Liga e teknikut Hansi Flick të pikëlluar, i goditur dje nga vdekja e të atit. Është titulli i 14-të për 37-vjeçarin Lewandowski, mes Polonisë, Gjermanisë dhe Spanjës. Bomberi ishte në stol dhe është drejt largimit, kush e di ndoshta drejt Italisë. Është La Liga e tretë për 18-vjeçarin Lamine Yamal, në tribunë duke kuruar dëmtimin muskulor në prag të Botërorit. Është La Liga e parë për Joan García, portierin e marrë nga Espanyol dhe blerja e vetme e merkatos 2025 për një Barça ende në krizë ekonomike dhe e bllokuar nga fair play financiar i La Liga-s.
Është triumfi i Spanjës: dje 9 nga 11 titullarët e Flick ishin të përzgjedhshëm nga Luis De la Fuente. Dhe mungonte Lamine, siç u përmend. Është një tjetër triumf i akademisë: 8 nga 11 lojtarët me më shumë minuta në këtë kampionat janë rritur te La Masia, të rinj dhe të fortë. Dhe kanë kushtuar zero. Është La Liga e presidentit Joan Laporta, i saporizgjedhur për herë të katërt, e dyta që nga rikthimi i tij në vitin 2021.
Lexo më tej: Barcelona mund ta fitojë titullin kundër Real Madrid: nuk ka ndodhur kurrë në histori
Për tu vlerësuar edhe Joao Cancelo, që në janar la Arabinë për të ardhur te Flick dhe për t’u shpallur kampion në Spanjë pas triumfeve në Portugali, Itali, Angli dhe Gjermani. Pastaj Gerard Martin, mbrojtës i majtë i kthyer në një qendërmbrojtës të besueshëm, Gavi i rikthyer nga dëmtimi i dytë i rëndë, motori Fermín me 6 gola dhe 9 asistime, truri Pedri, dhe tjetri i lindur në 2007, Cubarsí, titullar i padiskutueshëm.
