Ka nisur në Itali gjyqi ndaj 3 të dyshuarve që akuzohen se shkaktuan zjarrin në të cilin vdiq i mituri shqiptar Ledian Imeraj, ngjarje e ndodhur në vitin 2022 në qendrën sociale “Aedis” në Pasian di Prato, (kooperativa), ku mbahej viktima bashkë me të tjerët. Në seancën paraprake u dëgjuan nga Gjykata e Udines të dyshuarit e përfaqësuar nga avokatët e tyre, teksa mohuan akuzën.
Ledian Imeraj, 17 vjeç, kishte shkuar në Itali dy vite para ngjarjes, për të ndjekur një kurse për Mekanik, por zjarri fatkeq në prag të Vitit të Ri (30 dhjetor) 2022, i mori jetën. I riu pas plagëve të rënda nga djegiet, humbi jetën në spital.
Tre të pandehurit përballen me akuza për vrasje të paqëllimshme. Të dyshuarit janë përfaqësuesi ligjor i Aedis, Michele Lisco, kreu i shërbimit të parandalimit dhe mbrojtjes së kooperativës, Marco D’Ambros, dhe pronari i SD Security Dealer, Gianni Mainardis, të mbrojtur përkatësisht nga avokatët Paola Chialchia, Luca De Pauli dhe Roberto Mete.
Konkretisht, Lisco akuzohet për dështim në vlerësimin adekuat të rrezikut të zjarrit, D’Ambros për dështim në identifikimin e të gjithë faktorëve të rrezikut të zjarrit dhe Mainardis për dështim në bashkëpunim me punëdhënësin për të siguruar siguri të mjaftueshme dhe për dështim në sigurimin që operatori në detyrë atë natë të merrte trajnim specifik për atë që – sipas prokurorisë – ishte mbikëqyrje, një argument që mbrojtja e kundërshtoi që gjatë fazës së hetimit.
Gjatë seancës dëgjimore, prindërit dhe xhaxhai i viktimës, të përfaqësuar nga avokati Christian Vannucchi i Pratos, dhe operatori, i përfaqësuar nga avokati Maurizio Landelli, i cili pësoi djegie në pjesë të ndryshme të trupit ndërsa përpiqej të shpëtonte të miturit, iu bashkuan padisë civile, informon media italiane. Të pandehurit kanë njoftuar se nuk do të kërkojnë procedura alternative . Seanca dëgjimore është shtyrë deri në fund të qershorit, kur gjyqtarja e seancës paraprake Giulia Pussini do të vendosë nëse do t’i dërgojë ata në gjyq.
