James Franco është rikthyer në tapetin e kuq të Festivalit të Filmit në Cannes 2026, shtatë vite pasi karriera e tij në Hollywood u godit nga akuzat për sjellje seksuale të papërshtatshme.
Aktori i “Spider-Man”, 48 vjeç, u shfaq në ceremoninë hapëse të festivalit i shoqëruar nga partnerja e tij më e re, Izabel Pakzad, 30 vjeç. Çifti është në një lidhje që prej vitit 2017, ndërsa kjo ishte paraqitja e tretë radhazi e Franco-s në Cannes, pas rikthimeve të tij në festival edhe në vitet 2024 dhe 2025.
Sipas Variety, aktori u pa duke bërë foto me fansat dhe duke biseduar me aktorin Diego Luna përpara shfaqjes së filmit “The Electric Kiss”.
Rikthimi i tij në qendër të vëmendjes vjen pas periudhës së vështirë që nisi në vitin 2019, kur pesë ish-studente të shkollës së tij të aktrimit “Studio 4” e akuzuan për sjellje të papërshtatshme seksuale. Një prej tyre pretendoi se Franco e kishte detyruar të kryente seks oral.
Aktori i mohoi akuzat në atë kohë, ndërsa çështja përfundoi më pas me marrëveshje jashtë gjykate. Në intervista të mëvonshme, Franco ka pranuar se kishte marrëdhënie me studente gjatë kohës që jepte mësim, duke e cilësuar këtë si “sjellje të gabuar”.
Ai ka treguar gjithashtu se vuante nga varësia ndaj seksit, të cilën e zhvilloi pasi hoqi dorë nga alkooli në adoleshencë.
Skandali ndikoi rëndë në karrierën dhe jetën personale të aktorit, duke i kushtuar edhe miqësinë me Seth Rogen, i cili publikisht u distancua prej tij.
Megjithatë, Franco ka deklaruar së fundmi se është “një njeri i ndryshuar” dhe se periudha e izolimit nga Hollywood-i e detyroi të rishikonte jetën dhe prioritetet e tij.
